APLda YChL finalchilari to‘qnashuvi, A Seriyada Rim derbisi, “PSJ” esa yana Messisiz o‘ynaydi. Uik-endning eng muhim o‘yinlari haqida

APL. Chempionlar Ligasi finalchilari o‘zaro to‘qnash keladi, Ronaldu golli seriyasini davom ettirish uchun tayyor, Londonda esa derbi

“Chelsi” — “Manchester Siti”, 25-sentabr, 16:30

APLning 6-tur o‘yinlarini YChL va APLning amaldagi chempionlari o‘rtasidagi bahs boshlab beradi. 2020/21-yilgi mavsum Chempionlar Ligasi finalida ikki jamoa o‘zaro to‘qnash kelgan va Tomas Tuxel shogirdlari “shaharliklar”dan ustun kelib, chempionlikni nishonlagan edi. Qayd etish joiz, jamoalarning o‘zaro oxirgi besh o‘yinining to‘rttasida “Chelsi” g‘alaba qozongan. Pep Gvardiola uchun “chaqilmas yong‘oq”qa aylanib borayotgan London jamoasi ortda qolgan 5 turdan so‘ng 13 ochko bilan musobaqa jadvali yetakchisi bo‘lib turibdi. “Manchester Siti” esa 10 ochko bilan 5-o‘rinni band etib turibdi.

“Manchester Yunayted” — “Aston Villa”, 25-sentabr, 16:30

“Gol mashina”siga ega bo‘lgan “Manchester Yunayted” “Old Trafford”da “Aston Villa” bilan bahs olib boradi. Jamoa yetakchisi Jek Grilish “Manchester Siti” tarkibiga o‘tib ketganidan so‘ng “Villa” 5 o‘yinda 7 ochko jamg‘arishga muvaffaq bo‘ldi. Mankunianlar esa jadvalda kuchli uchlikni yakunlab bergan. Sulsher shogirdlari musobaqa yetakchisi “Chelsi” bilan bir xil ochko to‘plagan. Buning ustiga Ronaldu ketma-ket 4-o‘yinda ham gol urishni maqsad qilgan.

“Arsenal” — “Tottenhem”, 26-sentabr, 20:30

Mikel Arteta shogirdlari mavsumni juda yomon boshladi. Ketma-ket uch o‘yinda mag‘lubiyatga uchragan “Arsenal” oxirgi o‘rinlarga tushib ketgandi. Lekin so‘nggi ikki turda vaziyatni ozgina bo‘lsa ham o‘nglashga muvaffaq bo‘ldi. “Tottenhem” esa aksincha, mavsumni juda a’lo boshladi. Ketma-ket g‘alabalar qozonayotgan jamoa negadir oxirgi turlarda ochko yo‘qotishni boshladi. So‘nggi o‘zaro o‘yinlarning 8 tadan 6 tasida “Tottenhem” g‘alaba qozongan. Lekin “Arsenal” “Emireyts”da “shporlar”ga qarshi oxirgi 13 ta o‘yinning 11 tasida mag‘lubiyatga uchramagan.

Qolgan uchrashuvlar:

La Liga. Ronald Kuman uchun oxirgi imkoniyat bo‘lishi mumkin, “ishtahasi ochilgan” “Real” esa “Sariq submarina”ga qarshi

“Real Madrid” — “Vilyarreal”, 25-sentabr, 00:00

Karlo Anchelotti shogirdlari La Ligada 6 o‘yinning 5 tasida g‘alaba qozondi. Bitta o‘yinda durang natija qayd etdi. Jamoaning yetakchisi Karim Benzema esa 6 turda 8 ta gol va 7 ta golli uzatma muallifi bo‘lib turibdi. Bu Yevropa top-5 ligalaridagi eng yaxshi natija. “Vilyarreal” esa musobaqa jadvalida 12-o‘rinni egallab turibdi. Jamoa hisobida 7 ochko mavjud.

Jamoalarning o‘zaro oxirgi 5 o‘yinida “Real” mag‘lub bo‘lmayapti: 3 ta g‘alaba va 2 ta durang.

“Barselona” — “Levante”, 26-sentabr, 19:15

Ronald Kuman shogirdlari barcha musobaqalar doirasida 3 o‘yindan buyon g‘alaba nimaligini bilmay kelyapti. “Levante”ga qarshi uchrashuv Kuman uchun so‘ggi imkoniyat bo‘lishi mumkin. O‘zaro uchrashuvlarga nazar tashlaydigan bo‘lsak, jamoalar o‘rtasidagi oxirgi o‘yin 2021-yil 12-may kuni La Liga doirasida bo‘lib o‘tgan va unda jangovor durang (3:3) qayd etilgan.

Qolgan uchrashuvlar:

A Seriya. “Inter” yetakchilikni qaytarib olish uchun harakat qiladi, ammo raqib jiddiy — “Atalanta”, Rim derbisida Eldor Shomurodov ishtirok etadimi?

“Inter” — “Atalanta”, 25-sentabr, 21:00

A Seriyaning ortda qolgan 5 turidan so‘ng “Inter” 13 ochko bilan ikkinchi o‘rinda bormoqda. Birinchi o‘rindagi “Napoli”dan 2 ochko ortda va “Milan”dan urilgan gollar evaziga oldinda. To‘plar nisbati 18:5. Jamoaning to‘purarlari Edin Jeko (4) va Lautaro Martines (3). Gasperini shogirdlari esa 10 ochko bilan kuchli beshlikni yakunlab turibdi.

O‘tgan mavsumda jamoalar Bergamoda 1:1 hisobida durang o‘ynagan bo‘lsa, Milanda bo‘lib o‘tgan o‘yinda “Inter” 1:0 hisobida g‘alaba qozongan. “San-Siro”dagi oxirgi 5 o‘yinda “Atalanta” g‘alaba qozona olmagan.

“Latsio” — “Roma”, 26-sentabr, 21:00

Rim derbisining oxirgi 4 uchrashuvida 2 ta durang qayd etilgan, ikkala jamoa bittadan g‘alaba qozongan. “Latsio” A Seriyada 8 ochko bilan 7-o‘rinda turibdi. Joze Mourinyo shogirdlari 12 ochko jamg‘argan holda 4-o‘rinni band etgan. A Seriyaning oxirgi turida “Latsio” durang natija qayd etgan bo‘lsa (“Torino” bilan 1:1), “Roma” “Udineze”ni 1:0 hisobida mag‘lub etdi.

“Roma” yetakchilaridan biri Lorenso Pellegrini o‘tgan uchrashuvda qizil kartochka olgani sabab Rim derbisini o‘tkazib yuboradi. Joze Mourinyo Eldor Shomurodovni maydonga tushirsa, Rim derbisida ishtirok etgan ilk o‘zbek futbolchisiga aylanadi.

Qolgan uchrashuvlar

Liga 1. “PSJ” yana Messisiz o‘ynaydi, “Marsel” “Lens”ni qabul qiladi

“PSJ” — “Monpelye”, 25-sentabr, 00:00

Parijliklar ortda qolgan 7 turdan so‘ng Liga 1 da yaqqol yetakchi hisoblanadi. “PSJ” ushbu mavsumda birorta ochko yo‘qotmadi. So‘nggi 2 turda Pochettino shogirdlari 90-daqiqadan keyin gol urib, g‘alabani ilib ketdi. Ushbu uchrashuvda Lionel Messi jarohat sabab ishtirok eta olmaydi.

“Monpelye” esa 7-turdan so‘ng 10-o‘rinni egallab turibdi. Mehmonlar hisobida 9 ochko mavjud.

Qolgan uchrashuvlar

Bundesliga. “Borussiya”lar to‘qnashuvi, “Bavariya” Fyurtda mehmon bo‘ladi

“Groyter” — “Bavariya”, 24-sentabr, 23:30

“Groyter” yuqori diviziondagi o‘rnini saqlab qolishi juda qiyin bo‘ladi. 5 turdan so‘ng jamoa musobaqa jadvalining oxirgi o‘rnini egallab turibdi. Shtefan Laytl shogirdlari bir ochko jamg‘ara oldi, xolos. 2-turda “Arminiya”ga qarshi o‘yin durang natija bilan yakunlangan.

“Bavariya” esa birinchi o‘rinda turibdi. To‘g‘ri, “Volfburg” bilan bir xil ochko va qo‘shimcha natijalar evaziga undan oldinda. Mavsum startida “Borussiya M” bilan qayd etilgan durangdan so‘ng, Yulian Nagelsmann shogirdlari ketma-ket 4 ta o‘yinda g‘alaba qozondi.

“Borussiya M” — “Borussiya D”, 25-sentabr, 21:30

Gladbaxning “Borussiya”si mavsumni omadsiz boshladi. Adi Hyutter shogirdlari 16-o‘rinni band etib turibdi.

“Borussiya D” esa 12 ochko bilan 3-o‘rinda bormoqda. “Bavariya” bilan oradagi farq 1 ochko. Jamoa yetakchisi Erling Holand hisobida 7 ta gol mavjud.

Qolgan uchrashuvlar