London qiroli. “Arsenal” APL joriy mavsumidagi barcha derbida g‘alaba qozonyapti

“Arsenal” Premyer Liga 20-turida “Tottenhem”dan ustun keldi (2:0).

Shu tariqa “kanonirlar” APL 2022/23-yilgi mavsumida yettinchi derbini o‘z foydasiga hal qildi. Mikel Arteta shogirdlari ushbu mavsumda hali birorta London jamoasiga ochko ulashmadi.

Birinchi davrada ham “Tottenhem” taslim etilgandi (3:1). Shuningdek, “Arsenal” o‘z uyida “Fulhem” (2:1) va “Vest Hem”ni (3:1), safarda esa “Kristal Pelas” (2:0), “Brentford” (3:0) hamda “Chelsi”ni (1:0) taslim etishga muvaffaq bo‘ldi.

Qayd etish kerak, “Arsenal” safardagi to‘rtta o‘yinda o‘z darvozasidan birorta to‘p olib chiqmagan, raqiblar darvozasiga esa 7 ta gol urgan.

“Kanonirlar” APLda 18 ta o‘yindan keyin 47 ochko to‘plagan holda peshqadam bo‘lib turibdi.