Fransiyada mahbus jazoni o‘tab, hibsni tark etayotgan odamning sumkasiga yashirinib, qamoqdan qochib ketdi. Bu haqda fransuz ommaviy axborot vositalariga tayanib BBC xabar berdi.
Fransiya janubi-sharqidagi Lyon-Korbas qamoqxonasi 11-iyul kuni holat bo‘yicha tergov boshlagan.
“U boshqa bir mahbusning ozod etilishidan foydalanib, sumka ichiga yashirinib, qamoqdan chiqib ketgan”, deyiladi qamoqxona xizmati bayonotida.
Fransiya matbuoti qochib ketgan mahbus bir necha jinoyatlarda ayblangani, shuningdek, uyushgan jinoyatchilik bilan bog‘liq ish bo‘yicha tergov qilinayotgani haqida xabar bergan.
Iyun oyida Lyon advokatlar assotsiatsiyasi Lyon-Korbas qamoqxonasida mahbuslar ko‘payib ketayotganidan xavotir bildirgandi. 2025-yil 1-may holatiga ko‘ra, 678 o‘ringa mo‘ljallangan qamoqxonada 1200 ga yaqin odam hibsda saqlangan.
Izoh (0)