Shavkat Mirziyoyev Toshkent xalqaro investitsiya forumi tadbirlarida ishtirok etayotgan Qozog‘iston, Tojikiston bosh vazirlari, Qirg‘iz Respublikasi Prezident administratsiyasi rahbari, Rossiya Federatsiyasi hukumati raisining o‘rinbosari, Turkmaniston Vazirlar Mahkamasi raisining o‘rinbosarini qabul qildi. Bu haqda Prezident matbuot xizmati xabar berdi.
Qozog‘iston bosh vaziri Oljas Bektenov bilan uchrashuv avvalida Oljas Bektenov davlat rahbariga Qozog‘iston prezidenti Qosim-Jo‘mart To‘qayevning salomi va tilaklarini yetkazdi.
Oliy darajadagi uchrashuvlarda erishilgan kelishuvlar doirasida O‘zbekiston-Qozog‘iston strategik sheriklik va ittifoqchilik munosabatlarini yanada rivojlantirish va mustahkamlashning dolzarb masalalari muhokama qilindi.
Tovar ayirboshlash barqaror ortib borayotgani mamnuniyat bilan qayd etildi. Avtosanoat, elektrotexnika, to‘qimachilik, metallurgiya, farmatsevtika, qurilish, qishloq xo‘jaligi tarmoqlarida loyihalar muvaffaqiyatli amalga oshirilmoqda.
O‘zaro savdoni ko‘paytirish va ustuvor tarmoqlarda, shu jumladan hududlar darajasida sanoat kooperatsiyasining uzoq muddatli dasturini shakllantirish bo‘yicha ikki mamlakat hukumatlari tomonidan muvofiqlashtirilgan chora-tadbirlar ko‘rilishi muhim ekani qayd etildi.
Qirg‘iz Respublikasi Vazirlar Mahkamasi raisi, Prezident administratsiyasi rahbari Adilbek Kasimaliyev bilan suhbat avvalida Adilbek Kasimaliyev davlat rahbariga Qirg‘iz Respublikasi prezidenti Sadir Japarovning salomi va tilaklarini yetkazdi.
O‘zbekiston bilan Qirg‘iziston o‘rtasidagi do‘stlik va keng qamrovli strategik sheriklik munosabatlarini yanada mustahkamlash, savdo hajmini oshirish, sanoat kooperatsiyasini kengaytirish, hududlararo aloqalar va madaniy-gumanitar almashinuvni faollashtirish masalalari ko‘rib chiqildi.
Energetika va transport kommunikatsiyalaridagi yirik mintaqaviy loyihalarni, shu jumladan Qambarota GES-1 va Xitoy - Qirg‘iziston - O‘zbekiston temir yo‘li qurilishini jadallashtirishga alohida e’tibor qaratildi.
Joriy yilda o‘tkaziladigan Hukumatlararo komissiya va Hududlar rahbarlari kengashining navbatdagi yig‘ilishlarini samarali tashkil etish muhimligi ta’kidlandi.
Tojikiston bosh vaziri Qohir Rasulzoda bilan uchrashuv avvalida Qohir Rasulzoda davlat rahbariga Tojikiston Respublikasi prezidenti Emomali Rahmonning salomi va tilaklarini yetkazdi.
O‘zbekiston-Tojikiston do‘stlik, yaxshi qo‘shnichilik, strategik sheriklik va ittifoqchilik munosabatlarini oliy darajadagi kelishuvlar ijrosi doirasida yanada mustahkamlashning dolzarb masalalari ko‘rib chiqildi.
Ko‘p qirrali hamkorlikda yuksak darajaga erishilgani mamnuniyat bilan qayd etildi. Tovar ayirboshlash va yuk tashish hajmi ortmoqda, sanoat, energetika, elektrotexnika, to‘qimachilik, qishloq xo‘jaligi va boshqa ustuvor tarmoqlarda kooperatsiya loyihalari amalga oshirilmoqda.
Samarali hududlararo aloqalar va faol madaniy-gumanitar almashinuv yo‘lga qo‘yilgan. Sheriklikning yangi iqtisodiy kun tartibini shakllantirish, tovar ayirboshlashni ko‘paytirish bo‘yicha ta’sirchan choralarni ishlab chiqish, kooperatsiya va chegaraoldi hamkorlik loyihalarini faol ilgari surish muhim ekani ta’kidlandi.
Rossiya Federatsiyasi hukumati raisining o‘rinbosari Aleksandr Novak bilan uchrashuv avvalida Aleksandr Novak davlatimiz rahbariga Rossiya prezidenti Vladimir Putinning salomi va tilaklarini yetkazdi hamda forum muvaffaqiyatli o‘tayotgani bilan tabrikladi.
O‘tgan yil may oyida O‘zbekistonga davlat tashrifi va oliy darajadagi boshqa muloqotlar davomida erishilgan kelishuvlarni amalga oshirish masalalari ko‘rib chiqildi.
Energetika sohasidagi o‘zaro manfaatli sheriklikni kengaytirish, neft-gaz tarmog‘idagi qo‘shma loyihalarni jadallashtirish, tinch atom sohasida hamkorlikni yanada rivojlantirishga alohida e’tibor qaratildi.
Turkmaniston Vazirlar Mahkamasi raisining o‘rinbosari Nokerguli Ataguliyev bilan uchrashuv avvalida yuqori martabali mehmon davlat rahbariga Turkmaniston prezidenti Serdar Berdimuhamedov va Turkman xalqining milliy yetakchisi, Xalq Maslahati raisi Gurbanguli Berdimuhamedovning salomi va tilaklarini yetkazdi.
O‘zbekiston bilan Turkmaniston o‘rtasidagi do‘stlik, yaxshi qo‘shnichilik va strategik sheriklik munosabatlarini yanada rivojlantirish va mustahkamlashning dolzarb masalalari ko‘rib chiqildi.
Savdo-iqtisodiyot, transport-kommunikatsiya, energetika, suv xo‘jaligi sohalarida keng ko‘lamli hamkorlikning yangi kun tartibini shakllantirish, iqtisodiyotning turli tarmoqlarida kooperatsiyani kuchaytirish masalalariga alohida e’tibor qaratildi.
Bo‘lajak Hududlar forumi hamda qator qo‘shma ishbilarmonlik va madaniy tadbirlarga puxta tayyorgarlik ko‘rish muhim ekani ta’kidlandi.
Izoh (0)