O‘zbekiston Superligasida 12-tur yakunlandi. 15-iyun, yakshanba kuni chempionat doirasidagi uchta o‘yin bo‘lib o‘tdi.
Turning eng markaziy bahsi Qarshida kechdi. Unda “Nasaf” o‘z maydonida “Navbahor”ga qarshi maydonga tushib, 1:0 hisobida g‘alaba qozondi. Uchrashuvning 77-daqiqasida Dragan Cheran tomonidan kiritilgan yagona gol “Nasaf”ga uch ochko taqdim etdi. Serbiyalik hujumchi hakam tomonidan belgilangan 11 metrlik jarima zarbasini aniq amalga oshirib, joriy mavsumdagi ikkinchi golini urdi.
Mazkur g‘alabadan so‘ng “ajdarlar” 28 ochko bilan turnir jadvalida peshqadamlikni mustahkamladi. “Navbahor” esa 20 ochko bilan 4-o‘rinda bormoqda.
Yana bir qiziqarli uchrashuv Jizzaxda bo‘lib o‘tdi. Unda nominal mezbon “Xorazm” Samarqandning “Dinamo” klubini qabul qildi. O‘yin juda qizg‘in o‘tdi. Dastlab, urganchliklar 26-daqiqada hisobni ochdi. Oradan atigi 5 daqiqa o‘tib, “Dinamo” hisobni tenglashtirdi.
Ikkinchi bo‘limning 60-daqiqasida samarqandliklar hisobda oldinga chiqdi. Oybek O‘rmonjonov raqib himoyasidagi chalkashliklardan unumli foydalangan holda jamoasining ikkinchi golini kiritdi.
Natija o‘yinning oxirigacha o‘zgarmadi. Shundan so‘ng “Dinamo” 25 ochko bilan jadvalning ikkinchi pog‘onasiga ko‘tarildi. “Xorazm” esa 14 ochko bilan 9-o‘rinda bormoqda.
Kunning so‘nggi uchrashuvi Termizda o‘tkazildi. Unda mahalliy “Surxon” jamoasi Farg‘onaning “Neftchi” klubini qabul qilib, 0:0 hisobida durang o‘ynadi. Har ikki jamoa gol urishga harakat qilgan bo‘lsa-da, darvozabonlarning ishonchli harakati va hujumchilarning noaniq zarbalari sababli hisob ochilmadi.
Natijada jamoalar 1 ochkodan bo‘lishib olishdi. “Surxon” 14 ochko bilan 10-o‘rinda, “Neftchi” esa 20 ochko bilan 5-pog‘onada bormoqda.
O‘zbekiston Superligasi
14-tur
15-iyun, yakshanba
“Nasaf” — “Navbahor” 1:0
Gol: 1:0 — Dragan Cheran (77)
“Xorazm” — “Dinamo” 1:2
Gollar: 1:0 — Murod Bobojonov (26), 1:1 — Firdavs Abdurahmonov (31), 1:2 — Oybek O‘rmonjonov (60)
“Surxon” — “Neftchi” 0:0
Izoh (0)