O‘zbekiston terma jamoasi ertaga, 10-iyun kuni Jahon chempionati saralashi doirasidagi so‘nggi tur uchrashuvini o‘tkazadi. Temur Kapadze boshchiligidagi jamoa Toshkentdagi “Bunyodkor” stadionida Qatarga qarshi maydonga tushadi. Mazkur bellashuv oldidan matbuot anjumani tashkil etildi.
Anjumanning ikkinchi qismida mezbon O‘zbekiston terma jamoasi bosh murabbiyi Temur Kapadze va hujumchi Eldor Shomurodov jurnalistlar savollariga javob berdi.
Temur Kapadze:
— Assalomu alaykum. Avvalo barchani g‘alaba bilan tabriklayman. Ertaga bizni muhim o‘yin kutmoqda. Bu bahsda zafar quchib, xalqimizni xursand qilmoqchimiz. Jamoaning kayfiyati yaxshi, o‘yinga jiddiy tayyorgarlik ko‘ryapmiz.
Afsuski, jamoada ayrim yo‘qotishlar bor. Oston O‘runov ertangi uchrashuvda ishtirok etmaydi. Otabek Shukurovda kichik jarohat bor — u bilan maslahatlashib, maydonga tushish-tushmasligi borasida qaror qabul qilamiz.
BAAga qarshi o‘yinda qanday bo‘lmasin g‘alaba qozonishimiz kerak edi. Durang natija ham bizni qoniqtirardi, shu bois o‘yinda chiroyli futbol ko‘rsata olmaganmiz. Ayni paytda ham hujumkor o‘yin namoyish etmoqdamiz. Keyingi o‘yinlarda uslubni o‘zgartirishga harakat qilamiz, ehtimol, yangi futbolchilarni ham kashf etamiz.
Men terma jamoada o‘ynagan vaqtlarimda Qatarga qarshi katta qiyinchilik bo‘lmagan. Osiyo Kubogi va saralashning 3-bosqichida ham yaxshi o‘yin ko‘rsatganmiz, ammo biroz omad yetishmagani sababli mag‘lub bo‘ldik deb o‘ylayman.
Srechko Katanes bilan ko‘p bor uchrashganman. U bilan munosabatlarimiz yaxshi. Jahon chempionati yo‘llanmasida uning ham hissasi katta. Uchrashganimizda uni ham mundial yo‘llanmasi bilan tabrikladim.
Eldor Shomurodov:
— O‘zbekiston xalqini g‘alaba bilan tabriklayman. Stadionga keladigan muxlislarni chiroyli o‘yin bilan quvontirishga harakat qilamiz. Jahon chempionatiga yo‘llanma olish — katta yutuq, biroq hali bayram qilishga ulgurmadik.
Ertaga muhim bahs oldinda turibdi. Muxlislar oldida maydonga tushamiz va ular bizdan g‘alaba kutishadi. Shuning uchun g‘alaba qozonib, xalqimizga qo‘shaloq bayram ulashishga intilamiz.
Ertaga gol urgudek bo‘lsam, uni qanday nishonlashim haqida hali qaror qabul qilganim yo‘q.
Eslatib o‘tamiz, O‘zbekiston — Qatar uchrashuvi 10-iyun, seshanba kuni bo‘lib o‘tadi. O‘yin soat 18:45 da boshlanadi.
Izoh (0)