Futbol bo‘yicha Jahon chempionati 3-saralash bosqichi doirasidagi Eron — O‘zbekiston bahsi oldidan Oston O‘runov va Sherzod Nasrullayev jarohatdan qutulib, umumiy mashg‘ulotlarga qaytdi. Bu haqda O‘zbekiston futbol assotsiatsiyasi matbuot xizmati xabar berdi.
O‘runov Eron chempionati doirasidagi bahsda jarohat olgan edi. U mashg‘ulotlarga qaytgan bo‘lsa-da, Qirg‘izistonga qarshi bahs oldidan o‘zini noqulay his qilgani uchun murabbiylar shtabi qaydnomaga kiritmagan edi. Nasrullayev esa Superliga 1-turi doirasidagi “So‘g‘diyona” bilan o‘yinda safdan chiqqan.
Shuningdek, 7-turni diskvalifikatsiya sabab o‘tkazib yuborgan Umarbek Eshmurodov ham tarkibga qaytdi. “Nasaf” a’zosi 6-tur doirasidagi Shimoliy Koreya bilan o‘yinda qizil kartochka olgan va shu bois qirg‘izistonliklarga qarshi bahsni o‘tkazib yuborgan edi.
Jaloliddin Masharipov sariq kartochkalari ko‘payib ketganligi sababli Eronga qarshi bahsni o‘tkazib yuboradi. Futbolchi saralash doirasidagi Qatar va Qirg‘iziston bilan o‘yinlarda ogohlantirish olgan.
Ma’lumot uchun, Eron — O‘zbekiston o‘rtasidagi bahs 25-mart, seshanba kuni Tehrondagi “Ozodi” stadionida bo‘lib o‘tadi. Uchrashuv Toshkent vaqti bilan 21:00 da boshlanadi.
Izoh (0)