U-23 Osiyo chempionati sababli Superliga 11-turidagi ikki o‘yin qoldirildi
Futbol bo‘yicha U-23 Osiyo Chempionati 1—19-iyun sanalarida bo‘lib o‘tadi.
PFLning ma’lum qilishicha, ushbu musobaqada ishtirok etuvchi O‘zbekiston Olimpiya milliy terma jamoasi yig‘ini sababli Superliganing 11-turidan o‘rin olgan 2 o‘yin qoldiriladi.
O‘zbekiston futbol assotsiatsiyasi Superliga futbol klublariga xat yo‘llab, O‘zbekiston U-23 termasiga jalb etilgan futbolchilar qaydnomasini e’lon qildi. Temur Kapadze jamoasida “Paxtakor”ning to‘rt hamda “Nasaf”ning uch nafar futbolchisi borligi ma’lum bo‘ldi.
Terma yig‘ini 20-may sanasidan start olishi ko‘rsatib o‘tilgan. Biroq bu vaqtdan boshlab to qit’a chempionati startiga qadar Superliga klublari yana ikki turda maydonga tushishlari avvaldan begilab qo‘yilgandi. Umuman olganda taqvim O‘FA taqdim etgan ishchi reja asosida ishlab chiqilgan. Shu reja asosida avvaldan “Olimpik” futbol klubining ikki uchrashuvi Osiyo chempionatidan keyinga qoldirilgan.
Reglamentga ko‘ra esa milliy va olimpiya terma jamoasiga uch va undan ortiq futbolchisini yuborayotgan futbol klublari tur o‘yinini qoldirishni so‘rab murojaat qilishga haqli. Shundan kelib chiqib, “Nasaf” va “Paxtakor” klublarining o‘yinlarini tashkil qilish masalasi yana so‘roq ostida qoldi.
O‘zbekiston Professional futbol ligasi klublar bilan o‘zaro kelishgan holda terma bosh murabbiyiga taklif bilan chiqdi hamda ikki kundan keyin start olishi kutilayotgan 10-tur uchrashuvlarini saqlab qoldi. Kapadze “Nasaf” mazkur turda Husayn Norchayev xizmatidan, “Paxtakor” esa Hojimat Erkinov hamda Abbos Fayzullayev xizmatidan foydalanishiga rozi bo‘ldi.
Biroq bu futbolchilar 11-turda o‘z klublariga yordam bera olmaydi. Ma’lum bo‘lishicha, yaqin kunlar ichida U-23 terma jamoasi qit’a chempionati oldidan o‘rtoqlik o‘yinida maydonga tushadi.
Shundan kelib chiqib, Superliga 11-turidan o‘rin olgan qolgan uchrashuvlar o‘z vaqtida bo‘lib o‘tadi. “Dinamo”—“Nasaf” hamda “So‘g‘diyona”—“Paxtakor” uchrashuvlari qoldirilib, boshqa sanaga ko‘chiriladi.
