Marg‘ilonda Gentra ko‘chada o‘ynab o‘tirgan yosh bolani bosib ketgani aks etgan video tarqalgandi. Farg‘ona viloyati IIB haydovchiga nisbatan jinoyat ishi qo‘zg‘atilganini ma’lum qildi.
Qayd etilishicha, voqea 2025-yil 10-may kuni Marg‘ilon shahar Zuhro ko‘chasida sodir bo‘lgan. 1970-yilda tug‘ilgan fuqaro D.A. Lacetti rusumli avtomobilini boshqarib ketayotib, 2022-yilda tug‘ilgan A.A.ni urib yuborgan.
Ko‘chada o‘rnatilgan kuzatuv kamerasiga muhrlangan videoda avtomobil yo‘lda o‘ynab o‘tirgan bolaning ustidan bosib o‘tgani, haydovchi bolaning baqirganini eshitmay, o‘z yo‘lida bamaylixotir davom etib, hodisa joyidan ketib qolgani aks etgan.
Oqibatda tan jarohati olgan bolakay shifoxonaga yotqizilgan. IIB xabarida aytilishicha, hozirda uning ahvoli yahshi holatda.
“Nevaramning tos suyaklari 3 joyidan sindi. Bir oy to‘shakka mixlanib yotdi. Hozir ham o‘zida emas. Haydovchi ayol esa pinagini buzgani ham yo‘q. Olti oy davomida yaxshi bo‘ladi deyishdi. Lekin batamom yaxshi bo‘lib ketishiga hech kim kafolat bermaydi”, degan bolaning buvisi “Kun.uz” bilan suhbatda.
Mazkur holat yuzasidan Jinoyat kodeksining 266-moddasi 1-qismi (transport vositalari harakati yoki ulardan foydalanish xavfsizligi qoidalarini buzish) hamda 117-moddasi (xavf ostida qoldirish) bilan jinoyat ishi qo‘zg‘atilib, yakuniga ko‘ra tegishli sudlovga yuborish chorasi ko‘rilgan.
Farg‘ona viloyati IIB ota-onalarga murojaat qilib, farzadlarini qarovsiz qoldirmaslikka chaqirdi.
Jinoyat kodeksiga ko‘ra, hayoti yoki sog‘lig‘i xavf ostida qolgan va o‘zini o‘zi himoya qilish imkoniyatidan mahrum bo‘lgan shaxsga yordam ko‘rsatmaslik, basharti, aybdor bunday ahvoldagi shaxsga yordam berishi shart va bunday imkoniyatga ega bo‘lsa yoxud aybdorning o‘zi jabrlanuvchini xavfli ahvolga solib qo‘ygan va bu hol badanga o‘rtacha og‘ir yoki og‘ir shikast yetkazilishiga olib kelsa 300 soatgacha majburiy jamoat ishlari yoki 2 yilgacha axloq tuzatish ishlari bilan jazolanadi.
Kodeksning 266-moddasi 1-qismida belgilanishicha, transport vositasini boshqaruvchi shaxs tomonidan transport vositalari harakati yoki ulardan foydalanish xavfsizligi qoidalarini buzish badanga o‘rtacha og‘ir yoki og‘ir shikast yetkazilishiga sabab bo‘lsa, 3 yilgacha muayyan huquqdan mahrum qilib, BHMning 50 baravarigacha miqdorda jarima yoki 3 yilgacha ozodlikni cheklash yoxud 3 yilgacha ozodlikdan mahrum qilish bilan jazolanadi.
Izoh (0)