Rossiya rahbari Vladimir Putin 25 yil oldin Boris Yelsin bilan suhbatda prezident bo‘lishga tayyor emasligini aytganini ochiqladi. U bu haqda jurnalist Pavel Zarubinga bergan intervyusida ma‘lum qildi.
Putinning so‘zlariga ko‘ra, u o‘zini davlat rahbarligiga tayyor deb hisoblamagan. Ammo mamlakatni boshqarishga rozi bo‘lgach, birinchi navbatda o‘zi va Rossiya oldida turgan vazifalarni qanday hal qilishni o‘ylagan.
Shunchaki (prezidenti bo‘lishni) xohlamaganim uchun emas. Birinchidan, men uchun bu kutilmagan holat edi. Ikkinchidan esa, ha, ehtimol, xohlamagandirman, chunki o‘zimni bunga tayyor deb hisoblamaganman. Asosan shunga bog‘liq edi...
Mamlakatimizni saqlab qolish va rivojlantirish uchun juda ko‘p, dolzarb va ayni paytda hayotiy muhim masalalar bor edi. Shuning uchun men, to‘g‘risini aytsam, bu nimani anglatishi haqida, albatta, o‘yladim, lekin eng avvalo oldimizda turgan vazifalarni qanday hal qilish to‘g‘risida bosh qotirdim. Buni uddalay olamanmi, eplay olamanmi, deb o‘ylardim, dedi u.
Putin 2024-yil mart oyida ham Yelsin bilan suhbati haqida gapirgan edi. O‘shanda u 1999-yil avgust oyida Yelsinga iqtisodiyot va xavfsizlik sohasidagi muammolar ko‘lami tufayli prezident bo‘lishga tayyor emasligini aytganini ochiqlagan. Putin vaziyatni yomonlashtirishdan qo‘rqqanini tan olgan. Agar o‘tmishga qaytish imkoni bo‘lganida, xuddi shunday javob qaytarishini qo‘shimcha qilgandi.
Izoh (0)