Shimoli-sharqiy universitetning amerikalik olimlari elektronika ishlashini 1000 marta tezlashtirishi mumkin bo‘lgan materiallarning elektron xususiyatlarini boshqarishning ilg‘or usulini ishlab chiqdi. Bu teragersli protsessorlar yaratilishiga yo‘l ochadi. Tadqiqot natijalari Nature Physics (NatPhys) ilmiy jurnalida e’lon qilindi.
Mutaxassislar yorug‘lik va harorat ta’sirida o‘tkazuvchanlik va izolyatsiyalovchi holatlar orasida bir zumda o‘ta oladigan 1T-TaS2 kvant materialidan foydalandilar. “Termik so‘ndirish” deb nomlangan usul materialning o‘tkazuvchanligini misli ko‘rilmagan aniqlik bilan boshqarish imkonini beradi.
Zamonaviy chiplar kremniyga asoslangan bo‘lib, o‘tkazuvchi va izolyatsiyalovchi komponentlar orasida murakkab interfeyslarni talab qiladi. Yangi yondashuv yorug‘lik bilan almashtirilishi mumkin bo‘lgan bitta materialdan foydalanish imkonini beradi. Bu esa qurilma tuzilishini soddalashtiradi va ishlash tezligini oshiradi.
Materiallarning o‘tkazuvchanligini boshqarishga bo‘lgan dastlabki urinishlar o‘ta past haroratlar va qisqa muddatli ta’sirlar bilan cheklangan edi. Endi olimlar xona haroratida barqaror o‘tishga erishdilar.
“Hozirgi kunda protsessorlar gigagertslarda ishlayapti, ammo bizning texnologiyamiz teragertslarga o‘tish imkonini beradi”, deya tushuntirdi tadqiqotning yetakchi muallifi Alberto de la Torre.
Mutaxassislarning ta’kidlashicha, kremniy texnologiyalari fizik chegaralarga yaqinlashmoqda va kvant materiallari keyingi avlod hisoblash qurilmalari uchun asos bo‘lishi mumkin.
Izoh (0)