Biz ularni kuniga o‘n martalab qo‘limizga olamiz, sumkamizga, cho‘ntaklarimizga solamiz va hatto o‘rindiqlarga tashlaymiz. Ammo ma’lum bo‘lishicha, oddiy avtomobil kalitlari biz aloqada bo‘ladigan eng iflos buyumlardan biri ekan. Yangi tadqiqot shuni ko‘rsatdiki, ularda mobil telefon va klaviaturalarga qaraganda to‘rt barobar ko‘proq bakteriya to‘planar ekan.
MoneySuperMarket mutaxassislari 2000 nafar britaniyalik haydovchining kalitlarini tahlil qilib, ularning uchdan bir qismi kalitlarini hech qachon tozalamaganini aniqladi, garchi ularning ko‘pchiligi kalitlardan besh yildan ortiq vaqt davomida foydalanayotgan bo‘lsa ham. Taqqoslash uchun mutaxassislar hojatxona o‘rindiqlari, telefonlar va kompyuter klaviaturalarining tozaligini ham tekshirdi.
Ma’lum bo‘lishicha, telefonlarda 66 ta, klaviaturalarda 68 ta, avtomobil kalitlarida esa 241 ta bakteriya mavjud ekan (bu smartfonlarga qaraganda deyarli to‘rt barobar ko‘p). Olimlar hojatxona o‘rindig‘ida 1 100 ta mikroorganizmni aniqladi.
Kalitlardagi eng keng tarqalgan bakteriya Staphylococcus epidermidis bo‘lib chiqdi — sog‘lom odamlar uchun zararsiz, ammo antibiotiklarga chidamliligi tufayli operatsiyalardan keyin xavfli. Hatto bir holatda ichak tayoqchasi ham topilgan.
Mikrobiologlar kalitlarni sovunli eritma bilan yumshoq mato yordamida muntazam ravishda artib turishni maslahat beradi. Bunda oqartirgichdan foydalanmaslik kerak, chunki u metall va elektronikaga zarar yetkazishi mumkin. Shuningdek, kalitlarni suvga botirish ham mumkin emas.
Izoh (0)