O‘zbek estradasining uzoq yillik vakili, asl ismi Ilhom Yo‘lchiyev bo‘lgan xonanda DJ Piligrim 10-iyun kuni 49 yoshni qarshiladi. Shu munosabat bilan uning hayoti va ijodiy faoliyatiga nazar solamiz.
DJ Piligrim san’atga kirib kelganiga 27 yil bo‘ldi
Ilhom Yo‘lchiyev 1976-yilda Toshkent shahrida tug‘ilgan. U bolaligida etikdo‘zlik qilib, bozorda charm kurtkalar sotgan.
— Chilonzorda o‘sganman. Otamni ko‘rmaganman. Uning yo‘qligi, bo‘shliqni sport bilan to‘ldirganman. Bolaligimda fazogir bo‘lishni orzu qilardim. Ammo onam nemis tili o‘qituvchisi bo‘lishimni istadi. Men institutga kirgan paytda besh yillik ta’lim va bakalavrga qo‘shib magistr darajasini ham berishardi. 1998-yili nemis tili o‘qituvchisi deb yozilgan diplomni olganman. Ammo bu sohada ishlashni istamadim. Chunki qiziqish bo‘lmagan, diplom esa haligacha onamning shkafida chiroyli idishlar qatorida turadi. U yerda mening diplomimdan tashqari yana ikkitasi bor. Sababini bilmayman-u, bizda bugungi kun bilan emas, kelajak bilan yashaladi. Bu diplom ham go‘yo kelajak uchun olib qo‘yilgandek. Foydalaniladimi-yo‘qmi, buni Xudo biladi, deydi xonanda Ilhom Yo‘lchiyev.
“Taxallusim bir kechada paydo bo‘lgan”
Xonanda noodatiy taxallusi bir kechada tasodifan xayoliga kelgan va bir muddat tungi klubda ishlagan.
— 1998-yili didjeylarning festivali bo‘lgan. Unda Best DJ so‘zlarining qisqartmasidan foydalanmoqchi edim. Ammo tashkilotchilarga bu yoqmadi. “Ertalabgacha vaqt bor, tongda afishalarni chop etishga yuborishimiz kerak. O‘zing uchun yaxshiroq nom top”, deyishgan. Xayol surib, kinoga ko‘zim tushib qolgan. Undagi dialogda piligrim so‘zi ishlatilgandi. Izlasam, bu so‘z darvesh ma’nosini anglatar ekan. Ana, taxallus topildi, deb DJ Piligrim bo‘lishni ma’qul ko‘rganman, deydi xonanda.
“Maqsadim duetdoshlarimning mashhurligidan foydalanish bo‘lgan”
Ilhom Yo‘lchiyev shu kungacha juda ko‘p mashhur xonandalar bilan duet kuylagan. Xonanda ulardan “zina” sifatida foydalanganini yashirmaydi.
— Menda prodyuser yoki homiy bo‘lmagan. Hamisha o‘z faoliyatimni o‘zim moliyalashtirganman. Mashhur xonandalar bilan duet kuylashimning asosiy sababi esa ularning mashhurligidan foydalanib ko‘tarilish bo‘lgan. Bu borada egoist ekanligimni tan olaman. Duetlarning deyarli hammasi yaxshi chiqqan va odamlarga yoqqan. Hozir o‘zim ham yosh xonandalarni qo‘llab-quvvatlashga harakat qilaman. Duet aytgan, hatto qo‘shiq yaratib bergan paytlarim ham ko‘p bo‘ladi. “Ko‘k choy” guruhi bilan ishladik, ularning qo‘shiqlari odamlarga yoqyapti, deydi DJ Piligrim.
U mualliflik qo‘shiqlari bilan bir qatorda, o‘zbek shou-biznesining mashhur yulduzlari — Lola, Sevara Nazarxon va Yulduz Usmonova bilan hamkorlikdagi duetlari bilan ham mashhur.
DJ Piligrim duetdoshi xonanda Rayhonning ustidan IIBga shikoyat qilgan
Rayhon bu haqida Instagram’dagi sahifasida yozib qoldirgan.
Rayhonning so‘zlariga ko‘ra, Uchtepa tumani Ichki ishlar bo‘limidan unga qo‘ng‘iroq bo‘lgan va unda DJ Piligrim 17-mart kuni YouTube’dagi intervyuda shaxsiy haqoratlarga uchraganini iddao qilgan. Rayhon vaziyatga izoh berar ekan, intervyuda aytilgan gaplar avvalroq rejalashtirilgan ijodiy hamkorlik doirasida yuzaga kelganini ta’kidladi. Rayhonning aytishicha, u va DJ Piligrim yangi “Muhabbat” qo‘shig‘i ustida birgalikda ishlagan, xarajatlarning barchasini esa Rayhon o‘z zimmasiga olgan. Biroq kelishuvga zid ravishda, qo‘shiq premyerasi DJ Piligrimning kanallarida radiolardan oldin tarqatilgan, bu esa rejalashtirilgan efirlarni bekor qilinishiga sabab bo‘lgan.
— Avvaliga xafa bo‘ldim, keyin esa ahamiyat qilmadim, sababi muxlislar eshitishsa bo‘ldi deb qo‘ydim. Qayerda eshitgansizlar bunday tubanlikni? Intervyuda u haqida nima deganimni ko‘rib va bu voqeani o‘qib, o‘zingiz xulosa qiling. U odamga meni hech qanday gapim yo‘q va men bu insonga oramizdan nima gaplar o‘tganiga qaramay faqat yaxshilik tilayman, deydi Rayhon.
“San’at tufayli kasallikka chalinib, uni yoga orqali davolaganman”
Xonanda bir muddat Hindistonda yashab, o‘sha yerda sog‘lig‘i bilan bog‘liq muammolarga davo topgan.
— 2016-yil belim qattiq og‘rigan va egilolmay qolganman. Tekshirtirsam, umurtqada nerv tomirlarining qisilishi va kuchli shamollashi tashxisini qo‘yishgan. Uning paydo bo‘lishiga esa uzoq vaqt mashinada o‘tirish sabab ekan. Haqiqatan ham, gastrol safarlariga ketayotganda bir necha soat qimir etmay mashinada harakatlanamiz. Uning ustiga, ishim kompyuter bilan bog‘liq bo‘lgani ham salomatligimga salbiy ta’sir etibdi. Shundan keyin Hindistonga borib yashadim. U yerda yogani o‘rgandim. Hozir ham yoga mashg‘ulotlari bilan muntazam shug‘ullanaman. Agar kimdir shu kasallik bilan og‘riyotgan bo‘lsa, albatta, yoga bilan shug‘ullanishni tavsiya qilaman. Chunki salomatligim aynan yoga sabab yaxshilandi, deydi xonanda.
“Muhabbatsiz yashay olmadim, hozir bo‘ydoqman”
Xonanda omadsiz ikki nikohi va ikkinchi turmushidan ham ajrashgani haqida yashirmaydi.
DJ Piligrim ikki marta turmush qurgan va ikki marta ajrashgan. Birinchi marta u 2003-yilda “Setora” guruhining aʼzosi Komila Xo‘jayevaga uylangan. Ularning 2004-yilda tug‘ilgan Isom ismli o‘g‘li bor. Ammo ularning birgalikdagi hayot yo‘li uzoqqa bormadi — xonandalar 2005-yilda ajrashgan. Xonandalar ajralgandan keyin ham do‘st bo‘lib qolganini aytgan. Komila Xo‘jayeva farzandining otasini bu yilgi tug‘ilgan kuni bilan Instagram orqali tabrikladi.
Uzoq vaqt bo‘ydoq yurgan Ilhom Yo‘lchiyev ikkinchi marta, 2018-yilda turmush qurgan. Bu turmushdan Inom ismli o‘g‘li bor. Ammo bu turmush ham o‘xshamagan. Xonanda sobiq ayoli bilan 2022-yilda ajrashgan.
— O‘zimni yaxshilab boryapman, men qancha yaxshi bo‘lsam, shuncha yaxshi ayol keladi. Men muhabbatsiz yashay olmayman, ikkinchi ayolim bilan o‘rtamizda sevgi, muhabbat tugadi, deydi xonanda.
“Elita oilalarning to‘yi menga yetadi”
DJ Piligrim to‘yga chiqib xizmat qilishi 37 million so‘mligini rad etmaydi.
— Xizmat haqim juda katta, shunga yarasha jamoam ham. Sifatli narsalarning hammasi qimmat bo‘ladi. Toshkentda o‘rtacha 350 tacha elitadagi qatlam oilalar bo‘lsa, shularning to‘y-xizmatga chaqirishi bizga yetadi. Mening buyurtmachilarim elita oilalar. Oddiy odamlar ham tug‘ilgan kuni va to‘yida men xizmat qilishimni xohlashi mumkin. Shuning uchun biz doim yordam tariqasida kam ta’minlangan oilalarning xizmatiga, viloyatlarga ham borib turamiz. Menda balans bor, deydi u.
“Hayotimning eng yaxshi davrini kayf-u safoga sarfladim”
DJ Piligrim 2005—2009-yillarda giyohvandlikka berilib, moliyaviy qiyinchiliklarni boshdan kechirgan.
— Hamma narsaning to‘lovi bo‘ladi, tayyor turish kerak. O‘zimdan kichik uka-singillarimga yomon yo‘llardan qaytishini maslahat beraman. Men eng gullagan ikki-uch yil davrimda kayf-safoga berilib, vaqt yo‘qotganimga afsuslanaman. Yaxshi asarlar yaratsam, konsertlar bersam bo‘lardi. Lekin qilmaganman, dangasa bo‘lib, kayf-u safoga kirib, noto‘g‘ri yo‘lda yurganman, deya afsuslanadi xonanda.
Izoh (0)