Ko‘pchilik uchun muzlatkich eshigidagi magnitlar yoqimli esdalik, sayohatdan olib kelingan sovg‘a yoki interyerga o‘zgacha ko‘rinish beruvchi bezakdir. Ammo bu oddiy ko‘ringan buyumlar ortida salomatlik va texnika xavfsizligiga tahdid soluvchi omillar yashiringan bo‘lishi mumkin. Ushbu maqolada muzlatkichdagi magnitlar aslida qanday xavf tug‘dirishi haqida so‘z yuritamiz.
- Magnit maydonining elektronikaga ta’siri
Magnit maydonining maishiy texnikaga salbiy ta’siri haqidagi mish-mishlar asossiz emas. Katod nurli trubkalar (CRT)dan ishlab chiqilgan monitorlar davridayoq magnitlar ekran yaqiniga qo‘yilganda rang uzatishda buzilishlar bo‘lishi, hatto monitor ishdan chiqishi mumkinligi aniqlangan. Chunki bunday ekranlarda tasvir elektronlar ustida magnit maydoni orqali hosil qilinadi. Shuning uchun ular magnit ta’siriga ayniqsa sezuvchan bo‘ladi.
Foto: Xperimenter
Optik stabilizatsiyali smartfon kameralarida harakatlanuvchi detallar mavjud bo‘lib, magnitga yaqin yerda joylashgan bo‘lsa, bu qismlar deformatsiyalanishi mumkin. Xuddi shunday tartibda ba’zi sensorlar (kompas, magnitometr) ham magnitlar sabab noto‘g‘ri ishlashi mumkin.
- Magnitlarning salomatlikka ta’siri
Muzlatkichdagi magnitlar ham bundan mustasno emas. Dunyo bo‘ylab shunday elektron qurilmalar borki, ular hayot davomiyligi uchun xizmat qiladi. Yurak stimulyatorlari bunga misol bo‘ladi. U magnit maydoniga yaqin kelsa, og‘ir oqibatlarga olib kelishi mumkin, shu sababli yurak stimulyatori o‘rnatilgan odamlar magnit maydoniga yaqinlashmasligi, MRT tekshiruvlaridan o‘tmasligi va mobil telefonni stimulyatorga 30 santimetrdan yaqin tutmasligi kerak.
Tibbiy tadqiqotlarga ko‘ra, yurak stimulyatorining ayrim modellaridagi elektron sxemalar magnit maydon ta’sirida boshqa rejimga o‘tib, yurak urishini notekis bo‘lishiga va hattoki yurak fibrillyatsiyasiga olib kelishi mumkin. Bunda yurak stimulyatorining impuls generatori tashqi magnit maydonni noto‘g‘ri qabul qilishi va to‘satdan ishini to‘xtatishi yoki aksincha, haddan tashqari yuqori chastotada ishlay boshlashi mumkin.
- Muzlatkichning elektron qismlariga magnitning zarari
Yana bir xavf magnitlarning zamonaviy muzlatkichlarning old panelidagi sensorli displeylariga ta’siridir. Displey butunlay o‘chib qolishi yoki ba’zi belgilar ishlamay qolishi mumkin. Bu esa qimmat ta’mirlash ishlarini talab qiladi.
- Kompyuter qattiq diskiga ta’siri
Magnitlarni sistemali blok korpusiga yopishtirganlar ham xavf ostida. Kuchli magnitlar qattiq diskga yaqin turganda uning ma’lumot o‘qiydigan qismi siljib ketishi va xatoliklar kelib chiqishi mumkin.
- Muzlatkich bo‘yoq qoplamasining buzilishi
Estetik jihatni ham unutmaslik kerak. Uzoq vaqt davomida eshikda turgan magnitlar lak-bo‘yoq qatlamining sifatiga salbiy ta’sir qiladi. Natijada magnit tagida qoramtir yoki sarg‘ish dog‘lar, hattoki zang paydo bo‘lishi mumkin. Bu esa muzlatkich tashqi ko‘rinishiga putur yetkazadi.
Albatta, iliq mamlakatlardan olib kelingan bir-ikki esdalik magnit katta zarar keltirishi ehtimoldan yiroq. Ammo agar butun eshik magnitlar bilan to‘lib ketgan bo‘lsa, oqibatlari achinarli bo‘lishi mumkin. Shuning uchun magnit maydonining salbiy ta’sirini e’tiborsiz qoldirmaslik kerak. Tanasida tibbiy qurilma bo‘lgan insonlar esa magnitlardan butunlay yiroq bo‘lishi maqsadga muvofiq.
Izoh (0)