Toshkent shahri Yashnobod tumanidagi “Amir Temur” mahallasi aholisi bolalar maydonchasi va yashil hudud tadbirkor tomonidan egallab olinganidan qattiq norozi. “Daryo” muxbiri voqea joyida bo‘lib, vaziyatni o‘rgandi.
Aholi nima deydi?
Mahallada 144 ta xonadon bor. Jami 14 yoshgacha bo‘lgan 235 nafar bola, 87 nafar qariya yashaydi. Aytilishicha, hududda ilgaridan bolalar maydoni va yashil archalar mavjud edi. Oxirgi 1,5 yil ichida uch nafar tadbirkor mazkur joyni egallashga uringan.
-U2GiV1I9.avif)
Avvalgi ikki tadbirkor jamoat qarshiligidan so‘ng hududni tark etgan. Uchinchisi esa qurilishni to‘xtatmagan. Hozirgacha qirqqa yaqin yashil archalar kesib tashlanib, o‘rniga beton quyilgan.
-O4b0bdBI.avif)
“‘Militsiya chaqiraver, hech kimdan qo‘rqmayman. Quraman dedimmi, quraman’, deb ochiqchasiga aytishdi. Biz bu yerda imorat qurilishiga norozimiz, nohaqlik bo‘lyapti”, deydi Karima Maqsudova.
-qqFAnf3r.avif)
Aholining aytishicha, ko‘p qavatli uy oldida bolalar o‘ynashi uchun boshqa joy yo‘q. Yo‘laklar ham kichik, atrof to‘la mashina.
“Mahallamiz raisi umuman kelmaydi, xabar olmaydi. Eshitishimizcha, mana shu yerlar bo‘sh deb o‘zi quruvchilarga ko‘rsatgan ekan”, deydi qurilishdan norozi bo‘layotgan Eʼtibor Mahmudova.
-rTSDdTFb.avif)
“Murojaatlar besamar ketmoqda”
Mahalla ahliga hududda qanday bino qurilayotgani haqida maʼlumot berilmagan. Fuqarolar prokuratura, hokimiyat, sud, ekologiya, kadastr kabi davlat organlariga murojaat qilgan. Lekin hech qanday aniq yechim berilmagan. Tadbirkorga faqatgina ekologiya organi 15 million so‘m jarima solgan. U pulni to‘lagan.
“‘Jarima to‘ladimmi? Tamom, quraveraman’, deb ishni davom ettiryapti. Aslida bu yerdan 70 kvadrat metrli joy xarid qilgan ekan. Lekin u 140 kvadrat metrni egallab oldi. Maydonchasini ham, boshqasini ham o‘zimiz qilamiz. Bu yerda bolalarga o‘ynash uchun boshqa joy yo‘q. Bolam boshqa ‘dom’ oldida o‘ynab, tizzasini yirtib keldi, yettita chok tushdi”, deydi mahalla vakili Kamola Karimova.
-Ddn3T8vJ.avif)
Masʼullar nega jim?
Aholi mahalla raisi o‘z vazifasini bajarmayotgani, masʼullar esa masalani o‘zidan soqit qilishga urinayotganini aytmoqda.
-QuMPuW7k.avif)
“Hech kim javob bermaydi. Xatlar yozilyapti, imzo qo‘yilyapti, lekin natija yo‘q. Bu sansalorlik bizga adolat yo‘qligini ko‘rsatyapti”, deydi mahalla vakillari.
Bolalar o‘ynaydigan joyni tadbirkor qurilishga aylantirgan. Aholi bir necha marta shikoyat qilgan, lekin masalani na hal qilish, na tushuntirish bor. Odamlar “qonun kimni himoya qilyapti?” degan savol bilan umidsiz qolmoqda.
Izoh (0)