Shavkat Mirziyoyev vazirlik va hokimlik binolari oldiga mashinasini “parkovka” qilgan xodimlar jazolanishini ma’lum qildi.
Qayd etilishicha, ayrim vazirlik va idoralar, hokimliklarning ma’muriy binosi joylashgan ko‘chalar yopib qo‘yilganidan, shusiz ham tirband ko‘chalarda ularning xodimlari yo‘lni 2-3 qatorini “parkovka” qilib olganidan aholi norozi.
Prezident topshirig‘iga ko‘ra, 15 ming nafar haydovchilar o‘rtasida so‘rov o‘tkazildi. Poytaxtda ham, yirik shaharlarda ham qonuniy “parkovka”lar yetishmagani uchun ular mashinasini yo‘l bo‘yiga qo‘yishga majburligini bildirgan.
“Umuman, oddiy haydovchilar dardini eshitadigan odam, muloqot platformasi yo‘q”, dedi prezident.
Mutasaddilarga barcha tashkilot va mahallalardagi asossiz qo‘yilgan taqiqlovchi belgilarni olib tashlash topshirildi. Vazirlik va idoralar xodimlari aholiga noqulaylik yaratib, “parkovka” qilib olgan hududlarda foto va video kameralar o‘rnatib, jazo muqarrarligini ta’minlash vazifasi qo‘yildi.
Davlat xizmatchilari jamoat transportida yurish bo‘yicha namuna bo‘lishi kerakligi qayd etildi. Endilikda hukumat qarori bilan tasdiqlangan ro‘yxatdan tashqari rahbarlarning xizmat mashinasiga yo‘llarda ustunlik berilmasligi belgilandi.
Selektordan asosiy yangiliklar
- Mo‘ynoq, Nukus, Taxtako‘pir, Qonliko‘l, Yangiobod, To‘raqo‘rg‘on, Oqqo‘rg‘on, Sayxunobod, Buloqboshi, Ulug‘nor, Bandixon tumanlari va Ohangaron, Shirin, Nurafshon, Xonobod shaharlarida vaziyat yaxshilanib, birorta o‘lim bo‘lmadi.
- Qayerda hokim va YHXX birgalikda yo‘l infratuzilmasi bilan jiddiy shug‘ullansa, o‘sha yerda o‘zgarish kuzatilayotgani qayd etildi.
- Prezident yo‘l infratuzilmasini yaxshilash orqali avariyalarni kamaytirish bo‘yicha “Xavfsiz yo‘l” milliy dasturi boshlanishini e’lon qildi.
- Toshkent viloyatidan poytaxtga yangi 6 ta avtobus marshruti qo‘shiladi.
- Yo‘llarni qurish va ta’mirlashga 61 trln so‘m ajratildi.
- O‘zbekistonda bir oyda ikki marta qarama-qarshi yoki qizil chiroqda harakatlangan haydovchilar jarimadan chegirma olmaydi.
- Yil boshidan staji kam haydovchilarning qoidabuzarligi 15 foizga, og‘ir avariyalar 30 foizga qisqardi.
Izoh (0)