Jeff Bezos va Loren Sanchesning hashamatli to‘yi Venetsiyada keskin e’tirozlarga sabab bo‘ldi. Shaharning ko‘plab aholisi bu tadbirga salbiy munosabat bildirmoqda, bu esa turistlar oqimiga qarshi noroziliklar kuchaygan davrga to‘g‘ri kelmoqda.
To‘y 24-iyun kuni boshlanib, uch kun davom etadi, ammo mahalliy aholi milliarder to‘yi uchun aynan Venetsiya tanlanganidan mutlaqo norozi. The Cut nashriga ko‘ra, shaharda allaqachon ommaviy norozilik aksiyalari bo‘lib o‘tmoqda.
Namoyishlar to‘y marosimining aniq manzili oshkor etilishi bilan boshlangan. Rialto ko‘prigiga “Bezosga bu yerda joy yo‘q” degan yozuvli ulkan banner osilgan. Shuningdek, San Jorjo Majore minorasida milliarderning familiyasi qizil chiziq bilan chizilgan plakatlar paydo bo‘lgan.
Shahar aholisi turistlar oqimi ortidan yuzaga keladigan tirbandlik va kundalik hayotdagi qiyinchiliklardan xavotirda. Venetsiya hozirda boshqa ko‘plab Yevropa shaharlari kabi “overturizm”, ya’ni ortiqcha sayyohlar bosimi muammosini boshidan kechirmoqda. Aholining fikricha, Kim Kardashyan, Ivanka Tramp oilasi, Leonardo Di Kaprio va boshqa mashhurlar ishtirokidagi bu to‘y shahar uchun haqiqiy falokatga aylanishi mumkin.
Shu sabab namoyishchilar to‘yning o‘tkazilishiga yo‘l qo‘ymaslik niyatida. Mish-mishlarga qaraganda, tadbir ilgari xayriya maqsadida foydalanilgan Scuola Grande Della Misericordia binosida o‘tkazilishi mumkin. Namoyish tashkilotchilaridan biri Federika Toninello bu xabarga munosabat bildirar ekan, The New York Times nashriga quyidagicha izoh bergan:
“Bezos hech qachon Misericordia binosiga kira olmaydi. Biz ko‘chalar bo‘ylab saf tortamiz, kanallarni qutqaruv halqalari va qayiqlarimiz bilan to‘sib qo‘yamiz”.
Namoyishchilarning e’tirozlari faqat to‘yga emas, balki shahar hokimiyatiga, xususan, Venetsiya meriga ham qaratilgan. U 2024-yildan buyon korrupsiya ayblovi bilan tergov ostida. Namoyishchilarning ta’kidlashicha, u “shaharni Bezosga sotgan”, ilgari esa shaxsiy manfaatlari uchun investorlarga yerlar berib kelgan.
Yevropaning boshqa shaharlarida ham bu kabi chiqishlar bo‘lib o‘tmoqda. The Cut nashriga ko‘ra, 16-iyun kuni Parijdagi Luvr xodimlari ish joylarini tark etib, chipta olgan mehmonlarni ichkariga kiritmagan. Bu harakat ham haddan tashqari ko‘p sonli sayyohlarga qarshi norozilik sifatida baholangan.
Barselona, Italiyaning Genuya shahri, Lissabon, Ibiza va boshqa joylarda ham turizmga qarshi namoyishlar bo‘lib o‘tdi. San Sebastyanda o‘tkazilgan noroziliklardan birini uyushtirgan Aser Basurto The New York Times’ga bergan intervyusida quyidagilarni aytdi:
“Bizdagi muammo sayyohlarning ko‘pligida emas. Asl aybdorlar — turizm niqobi ortida yashirinib, mahalliy aholi hayoti va uy-joy bozori hisobidan foyda ko‘rayotgan spekulyantlar va ekspluatatorlardir”.
Ta’kidlash joizki, turizm Ispaniya yalpi ichki mahsulotining 12 foizini, Italiyada esa 10 foizini tashkil etadi. Shunga qaramay, fuqarolar fikricha, bu model iqtisodiy o‘sish emas, balki uy-joy taqchilligi kabi muammolarni keltirib chiqarmoqda.
Izoh (0)