Toshkent viloyatining Chirchiq shahridagi dehqon bozori ro‘parasida shahar Obodonlashtirish boshqarmasiga qarashli hududda noqonuniy bozor tashkil etilgan bo‘lib, undan tushayotgan daromad mahalliy budjetga emas, kimlarningdir cho‘ntagiga tushayotgani aytilmoqda. Bu haqda “Daryo”ga Xalq deputatlari shahar kengashi deputati Jahongir To‘laganov gapirib berdi.
Deputatga ko‘ra, Chirchiq dehqon va oziq-ovqat bozori hududida qonuniy savdo qilayotgan tadbirkorlar bozor tashqarisidagi noqonuniy yoyma bozor faoliyatidan norozi bo‘lib, bozorga kelayotgan xaridorlar yoyma bozordagi mahsulotlar bilan cheklanib, bozor ichkarisiga kirmayotganidan, bu esa ularning daromadi kamayishiga sabab bo‘layotganidan shikoyat qilgan.
Bozor ichkarisidagi tadbirkorlar deputatlarga murojaat qilib, “Soliq uchun ham, infratuzilma uchun ham pul to‘layapmiz. Lekin xaridorlar, aholi bozor ichkarisiga kirmayapti. Biz qanday qilib bu pullardan davlatga to‘lov to‘laymiz”, degan haqli savolni berishmoqda, — deydi deputat mazkur masalada so‘z yuritar ekan.
Jahongir To‘laganovning ma’lumot berishicha, mazkur muammo yetti oydan beri kun tartibida turibdi. Ammo mas’ullar bunga e’tibor qaratmayapti.
Bu masalani sessiya kun tartibiga ham qo‘ydik. Lekin bu noqonuniy savdo to‘xtamayapti. Demak, buning ortida kimdir turibdi. Ko‘rib turganingizning hammasi noqonuniy savdo hisoblanadi. Bu yerda savdo qiluvchilardan hech biri davlatga soliq to‘lamaydi. To‘lov undirilmayapti. Shuning hisobiga shaharda orttirilgan mablag‘imiz kam bo‘lmoqda. Chirchiqda deputatlarga, hokimiyatga bo‘layotgan murojaatlarning hammasi mablag‘ bilan bog‘liq bo‘ladi. Biz shu murojaatchilarga yordam berolmayapmiz. Lekin bu yerdan tushayotgan daromad kimningdir cho‘ntagiga oqib ketyapti. Agar bu kimningdir cho‘ntagini to‘ldirmaganda, allaqachon bu noqonuniy savdoning oldini olishar edi. Boisi aynan shu hudud shahar prokurorining sektori hisoblanadi. Prokuror allaqachon bunga chora ko‘rgan bo‘lar edi, — deydi deputat.
Deputat noqonuniy savdo qilayotganlar mas’ullarni tashvishlantirmayotganini aytar ekan, “shu hududda savdo qiluvchilar faoliyatini qonuniylashtirsa, biz ularni tadbirkorlar deb hurmat qilamiz, lekin hujjat qilmasdan noqonuniy savdo qilishda davom etsa, biz deputatlar bozor ichida qonuniy savdo qilayotgan tadbirkorlar faoliyatini himoya qilishimiz kerak”, dedi.
Jahongir To‘laganovning qo‘shimcha qilishicha, deputatlar bu muammo xususida nafaqat Xalq deputatlari shahar kengashida gapirgan, shahar prokurori va shahar IIB boshlig‘iga bunday noqonuniy savdoga chek qo‘yish borasida taklif ham bergan.
Bozor tashqarisida minglab noqonuniy savdo qilayotganlarga erkinlik berilishi, bozor ichkarisida qonuniy savdo qilayotganlarning manfaatiga zid bo‘lmoqda. Bu masala sessiyada ko‘tarilganiga yetti oydan oshdi. Buni hokim ham, prokuror va shahar Ichki ishlar boshlig‘i ham ko‘rdi. Nimaga bunga chora ko‘rilmayapti, dedik. Nega prokuror sektorida bunday noqonuniy harakat bo‘lyapti, dedik. Ammo natija yo‘q, — deydi deputat.
Deputatning hisob-kitobiga ko‘ra, hududda noqonuniy savdo qilayotganlar ming nafarga yetadi.
Ularning har biri YATT ochib, qonuniy ro‘yxatdan o‘tgan holda har oy 500 ming so‘mdan to‘lov qilsa, qancha pul bo‘ladi? O‘sha pul mahalliy budjetga tushib, deputatlar muhokamasi bilan to‘g‘ri sarflanadi. Bu puldan qancha beva-bechoralarga yordam beriladi, — deydi deputat Jahongir To‘laganov.
Deputat muammoga rahbarlar ham e’tibor qaratishi kerakligini uqtirmoqda.
Izoh (0)