Statista manbasi 2023-yilda internet tarmog‘ini eng ko‘p uzib qo‘ygan yoki bloklagan mamlakatlar ro‘yxatini eʼlon qildi. Ushbu ro‘yxat yil davomida sodir bo‘lgan maqsadli tarmoq uzilishlari va ulardan zarar ko‘rgan oddiy aholi miqdorini mutanosib tarzda aks ettiradi.
Statistikada keltirilishicha, internetni bloklash bilan bog‘liq holatlarning ko‘pchiligi, asosan, fuqaroviy tartibsizlik va hukumatga qarshi norozilik holatlari yuzaga kelgan vaziyatlarda amalga oshirilgan. Hukumatlar maʼlumotlar oqimini uzib qo‘yish orqali norozi kayfiyatdagi fuqarolarni oshiqcha hissiyotga berilishdan qaytarishga uringan.
Manbaga ko‘ra, 2023-yilda Hindistonda hukumat tomonidan internet o‘chirib qo‘yilishi bilan bog‘liq holatlar oqibatida fuqarolar umumiy hisobda 470 milliard soatdan ortiq vaqt global tarmoqdan uzilgan. Internetni bloklash bo‘yicha Hindiston reytingda eng yuqori o‘rinni egallagan. Uzilishlar asosan, Rajaston va Dehlida yuzaga kelgan fermerlar namoyishi davomida maqsadli amalga oshirilgan.
Statistikada Myanma Hindistondan keyin ikkinchi o‘rinni egallagan. 2023-yilda bu mamlakatdagi internet uzilishlari umumiy hisobda 444,8 milliard soat davom etgan. Hukumat mamlakatning ayrim qismlarida emas, balki butun Myanmada internetni o‘chirish yo‘lidan borgan. Shu yo‘l bilan rasmiylar xalq g‘alayonlarining oldini olishga uringan.
Shuningdek, o‘tgan yil davomida bloklanishlar Efiopiyada 444,3 milliard, Eronda 442,8 milliard , Rossiyada 152,9 milliard va Tanzaniyada 107,5 milliard soat davom etgan. Rossiya iqtisodiyoti internet uzilishlari ortidan 2023-yilda 4 milliard dollar zarar ko‘rgan.
Manbada qayd etilishicha, internet uzilishi oqibatlari bilan bog‘liq nisbatan past ko‘rsatkich Senegal va Ozarbayjonda kuzatilgan. 2023-yilda Senegalda 31,6 milliard va Ozarbayjonda 30,1 milliard soat internetsiz o‘tkazilgan.
Izoh (0)