Kanadaliklarning yarmidan ko‘pi endi AQSHni Rossiya, Eron yoki Shimoliy Koreyadan ham ko‘proq o‘z mamlakati uchun asosiy tahdid sifatida ko‘rmoqda. Bu haqda Pew Research Center tadqiqot markazining yangi tadqiqotida ma’lum qilingan.

So‘rov natijalariga ko‘ra, Kanada fuqarolarining 59 foizi AQSHni jiddiy xavf deb hisoblaydi. Bu Donald Trampning Kanada AQSHning “51-shtati”ga aylanishi kerakligi haqida tobora ko‘proq aytayotgan so‘zlari fonida o‘sib borayotgan tashvishni aks ettiradi. Kanada hukumatining bir necha bor qilgan iltimoslariga qaramay, prezident Tramp Kanadaning ertami-kechmi AQSHning bir qismiga aylanishini ta’kidlashda davom etmoqda.
Oq uy rahbarining so‘nggi yillardagi tashqi siyosati hatto ittifoqchilariga nisbatan ham savdo bojlari bilan tahdid qilish, Eronga hujumlar uyushtirish va Grenlandiyani sotib olish istagi haqidagi bayonotlarni o‘z ichiga olgan.
Kanada Vashington siyosatidan xavotirda bo‘lgan yagona davlat emas. Trampning birinchi prezidentlik kampaniyasidanoq an’anaviy nishoniga aylangan Meksikada so‘rovda qatnashganlarning 68 foizi AQSHni asosiy tahdid deb atagan.
“Shunga qaramay, kanadaliklarning yarmidan ko‘pi hali ham AQSHni asosiy ittifoqchi deb biladi. Bu munosabatning ikki tomonlamaligini ko‘rsatadi. Oq uy harakatlaridan xavotirlanish unga qaramlikni anglash bilan uyg‘unlashadi”, deb ta’kidlaydi tadqiqot mualliflari.
Yevropada tahdidni idrok etish butunlay boshqacha. U yerda, ayniqsa Ukrainada davom etayotgan urush fonida, asosiy xavf hamon Rossiya hisoblanadi. Polshada respondentlarning 81 foizi Moskvani asosiy xavf deb atagan, Shvetsiyada esa bu ko‘rsatkich 77 foizni tashkil etgan. Shu bilan birga, Yevropadagi o‘ng partiyalar tarafdorlari orasida Rossiyani xavfli deb hisoblovchilar sezilarli darajada kamroq ekanligini Pew Research aniqlashtirgan.
So‘rov 25 mamlakatda 28 mingdan ortiq kishi o‘rtasida o‘tkazilgan. AQSHga eng sodiq davlatlar orasida Isroil yetakchilik qilmoqda — uning 95 foiz fuqarosi Amerikani o‘zining asosiy ittifoqchisi deb atagan. Keyingi o‘rinlarda Janubiy Koreya (89 foiz) va Yaponiya (78 foiz) joylashgan.
Izoh (0)