Balida bo‘lib o‘tgan G20 sammitida birgina diplomat Rossiya tashqi ishlar vaziri Sergey Lavrov bilan uchrashdi, u ham bo‘lsa Xitoy tashqi ishlar vaziri Van I. Bu haqda Bloomberg xabar berdi.
“G20 sammitida tashqi ishlar vaziri Van I rossiyalik hamkasbi Sergey Lavrov bilan rasman uchrashgan yagona diplomat bo‘ldi. Bu shu yil hisobidan ularning o‘ninchi muzokaralari bo‘ldi”, — deyiladi xabarda.
Xitoy TIV rahbari Pekin bundan keyin ham “tinchlik muzokaralari”ga ko‘maklashishda “xolis va adolatli pozitsiyani egallashi hamda konstruktiv rol o‘ynashi”ni aytdi.
Bloomberg Xitoy G20 sammiti yakunida yigirmatalikning aksariyat a’zolari “Ukrainadagi urushni qat’iy qoralashi” haqidagi bayonotni imzolaganiga e’tibor qaratdi. Sammit doirasida XXR raisi Si Szinpin bilan uchrashgan Fransiya prezidenti Emmanuel Makron Xitoyning BMT nizomiga sodiqligini “samimiy” deb atadi.
Indoneziyaning Bali orolida 15—16-noyabr kunlari G20 mamlakatlari yetakchilarining sammiti bo‘lib o‘tdi.
G20 tarkibiga Argentina, Avstraliya, Braziliya, Buyuk Britaniya, Germaniya, Hindiston, Indoneziya, Italiya, Kanada, Xitoy, Meksika, Rossiya, Saudiya Arabistoni, AQSH, Turkiya, Fransiya, Janubiy Koreya, Janubiy Afrika, Yaponiya va Yevropa Ittifoqi kiradi.
G20 ga a’zo bo‘lmasa-da, sammitga Ukraina prezidenti Vladimir Zelenskiy ham taklif qilindi. Dastlab Zelenskiy agar G20 sammitida Rossiya prezidenti Vladimir Putin ishtirok etsa, unda qatnashishdan bosh tortishini ma’lum qilgandi.
Keyinroq Kreml ish jadvali va Rossiyada bo‘lish zarurati bilan bog‘liq holda Vladimir Putin G20 da qatnashmasligini ma’lum qildi. Bloomberg qayd etishicha, Putin Ukraina bilan mojaro fonidan boshqa davlat yetakchilarining “sovuq nigohlaridan qochish” uchun sammitda qatnashishdan bosh tortgan. Uning o‘rniga Rossiya delegatsiyasiga mamlakat tashqi ishlar vaziri Sergey Lavrov boshchilik qildi.
Zelenskiy sammitda onlayn qatnashdi.
Izoh (0)