“Putin kabi Stalin ham ukrainlarni yo‘q qilmoqchi bo‘lgan” — Britaniya Golodomor voqeasini Ukraina xalqining genotsidi sifatida tan oldi
Britaniya parlamenti Jamoatlar palatasi deputatlari 1930-yillardagi Golodomor voqeasini Ukraina xalqining genotsidi sifatida tan olish to‘g‘risidagi qarorni bir ovozdan ma’qulladi, deb xabar bermoqda BBC rus xizmati.
Ovoz berish Buyuk Britaniya Konservativlar partiyasi deputati Paulin Lethamning tashabbusi bilan o‘tkazilgan. Uning so‘zlariga ko‘ra, ushbu qaror Rossiya prezidenti Vladimir Putinning Ukrainada olib borayotgan urushi munosabati bilan unga yuborilgan xabarnoma bo‘lishi kerak.
“Sovet Ittifoqi atay ochlikdan o‘ldirish va majburan ko‘chirish yo‘li bilan millionlab ukrainlarni qirib tashlagan, bu Ukrainadagi bugungi voqealarni eslatadi. 30-yillarda Stalin, xuddi bugungi Putin kabi, ukrain xalqi va ukrainaliklarning o‘ziga xosligini yo‘q qilmoqchi bo‘lgan”, — dedi deputat.
Britaniya parlamentining qarori Rossiyaga biror bir yuridik ta’sir o‘tkaza olmaydi, deb eslatdi jurnalistlar.
Golodomor genotsid sifatida
SSSRda Stalin hukmronligi davrida amalga oshirilgan qishloq xo‘jaligini majburiy kollektivlashtirish oqibatida 1932—1933-yillarda mamlakatda ommaviy ocharchilik yuzaga keldi, uning qurbonlari millionlab odamlarga yetdi. Ukraina bu falokat Sovet Ittifoqi rahbariyati tomonidan ataylab qo‘zg‘atilganini ta’kidlaydi.
Golodomor uzoq vaqtdan beri Ukraina va Rossiya o‘rtasidagi asosiy bahs mavzusi bo‘lib kelgan. Moskva Kiyevning yirik ocharchilik qurboni faqat ukrainaliklar bo‘lgan degan fikrini rad etib, Markaziy Osiyo va Rossiyadagi millionlab odamlar ham ocharchilikdan jabr ko‘rganini aytadi.
2006-yilda Ukraina Oliy Radasi Golodomorni Ukraina xalqiga qarshi genotsid akti deb e’lon qilgan. Bir necha yillar davomida Ukraina rasmiylari xalqaro maydonda Golodomorni genotsid sifatida rasman tan oldirishga urinib kelmoqda. Urush fonida ba’zi davlatlar bu qarorni qo‘llab-quvvatladi.
Golodomorni Ukraina xalqining genotsidi sifatida rasman tan olgan davlatlar ro‘yxatiga AQSH, Kanada, Avstraliya, Portugaliya, Meksika, Braziliya, Fransiya, Islandiya va boshqalar kiradi.
