Isroil milliy xavfsizlik vaziri Itamar Ben Gvir xalqaro hamjamiyatga murojaat qilib, G‘azoga yordamni to‘xtatishga chaqirdi. Bu haqda Al Jazeera xabar berdi.
Vazir G‘azoga kirib kelayotgan gumanitar yordam “mutlaq sharmandalik” ekanini ta’kidlab, uni vaqtincha emas, balki butunlay to‘xtatishga chaqirgan.
“Men bir necha bor ogohlantirdim. Afsuski, bir yarim oy oldin yordam kirishiga qarshi ovoz bergan yagona odam men bo‘ldim. Yordam HAMASga jon bag‘ishlashiga ishonchim komil edi. O‘shanda ba’zilar meni masxara qilib, yordam faqat shimoliy sektorga 10 kun davomida kirishini aytgandi.
Bugun esa bir narsa aniq: HAMAS oziq-ovqat va tovarlar miqdorini nazorat qiladi, bu esa uning omon qolishiga yordam bermoqda. Yordamni to‘xtatish g‘alabaga erishishni tezlashtiradi. Men bosh vazirdan vazirlar mahkamasining navbatdagi majlisida ushbu masalani yana ovozga qo‘yishni talab qilaman”, degan vazir.
Bu Ben Gvirning G‘azoga gumanitar yordamni to‘xtatishga chaqirgan birinchi holat emas. U 2024-yili ham shunday chaqiriq bilan xalqaro hamjamiyatga murojaat qilgandi. Shundan so‘ng, Avstraliya, Kanada, Yangi Zelandiya, Norvegiya va Buyuk Britaniya unga va yana bir vazirga qarshi sanksiyalar joriy qilgandi.
“Milliy xavfsizlik vaziri Itamar Ben Gvir va moliya vaziri Bezalel Smotrichga sayohat taqiqlanadi va aktivlar muzlatiladi”, deya ma’lum qilgandi Britaniya hukumati.
Ikkala vazir ham bosib olingan G‘arbiy Sohil va G‘azodagi urush bo‘yicha o‘z pozitsiyalari haqidagi “g‘azablantiruvchi” izohlari uchun tanqidga uchragan.
Izoh (0)