Malika Diananing Belville Sassoon brendiga tegishli mashhur libosi Julienʼs tomonidan tashkil etilgan kiyim va aksessuarlar xayriya auksioniga qo‘yildi. Malika Diana muzeyi asoschisi va kuratori Rene Plant libosni 520 ming dollarga sotib oldi, bu uning boshlang‘ich 300 ming dollarlik bahosidan ancha oshib ketdi.
“Malika Diana uslubi va shohona to‘plam” deb nomlangan auksion Los Anjelesdagi Peninsula Beverly Hills mehmonxonasida bo‘lib o‘tdi. U yerda 300 dan ortiq lotlar, jumladan, birinchi marta sotuvga chiqarilgan obrazlar namoyish etildi.
Bugungi kunda qirollik aʼzolari orasida bir xil libosda takroriy chiqishlar odatiy holdir, ammo Diana o‘z vaqtida Belville Sassoonʼning ushbu libosini turli tadbirlarga kiyib, protokolni buzgan. Uning kelinlari Keyt Middlton va Megan Markl ham keyinchalik barqaror moda yo‘lidan borishdi.
1988-yildan 1992-yilgacha Diana kasalxonalarga tez-tez tashrif buyurganida krepdeshin matosidan tikilgan bu ko‘k ko‘ylakni kiygan, shuning uchun u “g‘amxo‘rlik ko‘ylagi” deb nom olgan. Keng yengli ko‘ylak o‘sha davrning yorqin moda yo‘nalishlarini mukammal aks ettiradi.
“U yorqin, qulay, va yoqimli edi”, dedi Julienʼs asoschilaridan biri va ijrochi direktori Martin Nolan People nashriga bergan intervyusida. — Diana shifoxonalarga bolalar va kattalar oldiga kelganida, ko‘ylakdagi ranglar barchani o‘ziga tortganidan uni hamma quchgisi kelardi.
Diana “g‘amxo‘rlik libosi”ni turli mamlakatlar, jumladan, Avstraliya, Braziliya, Nigeriya, Ispaniya va, albatta, Buyuk Britaniyada kiygan.
Izoh (0)