AQSh prezidenti Jo Bayden mamlakatda qullar ozod qilingan kunni federal bayram sifatida tan olish to‘g‘risidagi farmonni imzoladi. Bayram 19-iyun kuni nishonlanadi. Bu haqda Oq uy veb-saytiga tayanib “RBK” xabar berdi.
“Bugun biz 19-iyun kunini federal bayram deb e’lon qilamiz. Ushbu kunni yodga olish uchun Kongressdagi ikki partiyaning qo‘llab-quvvatlovi bilan biz demokratlar va respublikachilar sifatida bir safda turganimizdan mamnunman. Umid qilamanki, bu o‘zaro munosabatlarimizda o‘zgarish boshlab beradi”, — dedi Bayden.
Bayden “buyuk xalqlar ularning eng alamli lahzalarini e’tiborsiz qoldirmasligini” ta’kidladi. Bu yil 19-iyun shanba kuniga to‘g‘ri kelgani sababli AQShda dam olish kuni 18-iyunga ko‘chirildi.
Yangi bayram Milliy mustaqillik kuni (National Independence Day) deb nomlandi. Bunga qadar ham AQShning 4-iyulda nishonlanadigan Mustaqillik kuni (Independence Day) mavjud. Ushbu sanada 1776-yilda AQShning Buyuk Britaniyadan mustaqilligi to‘g‘risidagi deklaratsiya qabul qilingan.
AQShda qullikning tugatilishiga qadam mamlakatning 16-prezidenti Avraam Linkoln 1863-yil 1-yanvarda qullarni ozod qilish to‘g‘risidagi qarorini e’lon qilishi bilan qo‘yildi. Janubiy shtatlar bunga norozi bo‘lgan, ularning qarshiligi 1865-yilgacha davom etgan fuqarolar urushiga olib keldi. 1865-yil dekabrda butun mamlakat bo‘ylab qullik bekor qilinib, Konstitutsiyaga 13-tuzatish qabul qilindi.
Bayden federal bayram sifatida tanlagan 19-iyun kuni qullikning Texas shtatida bekor qilinishi bilan bog‘liq. Shtat qullik bekor qilinishini 1865-yil 19-iyun kuni Janubiy Konfederatsiyadan eng oxirgi bo‘lib tan olgan.
Mavzuga doir:
Izoh (0)