Fransiya imperatori Napoleon I Bonapartning qilichi Parijda 4,7 million yevroga sotildi, deb xabar beradi Le Figaro. Nashrning aniqlik kiritishicha, qurol 700 ming yevrodan 1 million yevrogacha baholangan, bu esa uni “auksionda sotilgan eng qimmatbaho Napoleon artefaktlaridan biri”ga aylantirdi.
“Summa 2007-yilda Marengo jangidagi qilichi uchun o‘rnatilgan 4,8 million yevrolik jahon rekordiga yaqinlashdi”, deya qo‘shimcha qildi auksion uyi vakillari.
Sotilgan qilich Napoleonning shaxsiy quroli edi. Bonapart qurolni 1802-1803-yillarda Versal manufakturasi direktori Nikola-Noel Butedan buyurtma qilgan. Imperator bo‘lgach, Napoleon I qilichni hukmronligining oxirigacha saqladi. Keyinchalik uni marshal Emmanuel de Grushiga sovg‘a qildi. O‘shandan beri nufuzli qilich sarkardaning avlodlarida saqlanib kelinmoqda.
Auksionda sotilgan qilichning ikkinchi nusxasi Sankt-Peterburgdagi Ermitaj muzeyida saqlanadi.
Izoh (0)