“Daryo” nashri 13-sentabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Gulnora Karimova boshchiligidagi jinoiy guruh o‘zlashtirgan noqonuniy mablag‘larning Shveysariyada undiriladigan miqdori ma’lum qilindi
Gulnora Karimova boshchiligidagi jinoiy guruh tomonidan noqonuniy orttirilgan va Shveysariyada legallashtirilgan 686 million AQSH dollari miqdoridagi mablag‘lar undirilishi bo‘yicha ishlar olib borilmoqda. Bu haqda bugun, 13-sentabr kuni Toshkent shahrida bo‘lib o‘tayotgan brifingda Adliya vaziri o‘rinbosari Muzraf Ikromov ma’lum qildi, deya xabar bermoqda “Daryo” muxbiri.
Ushbu ish Shveysariya sudlarida ko‘rib chiqilib, taqriban 336 million AQSH dollari uzil-kesil musodara qilingan. Shundan 131 million dollar O‘zbekistonga qaytarilishi hal bo‘ldi. 205 million dollar bo‘yicha ishlar yakuniga yetmoqda. Hozirda qo‘shimcha 307 million AQSH dollari miqdoridagi mablag‘larni musodara qilish masalasi Shveysariya sudlarida ko‘rib chiqilmoqda”, – dedi vazir o‘rinbosari.
Ma’lum qilinishicha, 131 million dollar 10 haftada O‘zbekistonga qaytariladi.
BMT: Dunyo bo‘ylab 50 millionga yaqin odam zamonaviy qullikda yashamoqda
Dunyo bo‘ylab 50 millionga yaqin odam zamonaviy qullikda, deya ma’lum qildi Xalqaro mehnat tashkiloti.
Birlashgan Millatlar Tashkiloti agentliklari olib borgan tadqiqoti shuni ko‘rsatdiki, so‘nggi 5 yil ichida qullikdagi odamlar soni sezilarli darajada oshgan va bu taxminan 50 million kishini tashkil etmoqda. Ularning 28 millioni majburiy mehnatga jalb qilingan, 22 millioni esa majburiy nikohda yashamoqda.
Ta’riflanganidek, zamonaviy qullik ikki asosiy komponent — majburiy mehnat va majburiy nikohdan iborat. Ikkalasi ham tahdid, zo‘ravonlik, majburlash, aldash kabilar bilan odamlarni ekspluatatsiya qilishni nazarda tutadi.
Qirolicha Yelizaveta II ning dafn marosimiga Rossiya, Belarus va Myanma vakillari taklif qilinmadi
Buyuk Britaniya qirolichasi Yelizaveta II ning dafn marosimiga Rossiya, Belarus va Myanma davlatlari taklif etilmadi. Bu haqda Britaniya hukumati manbalariga tayanib, Meduza nashri xabar bermoqda.
Sky News telekanalining ma’lum qilishicha, Rossiyaning Ukrainaga bostirib kirishi sababli uch davlat vakillari marosimga taklif etilmagan.
19-sentabr kuni Londonda Yelizaveta II ning dafn marosimida dunyoning turli davlatlaridan 500 ga yaqin yuqori martabali mehmonlar ishtirok etishi kutilmoqda.Toshkentdagi buddistlar ibodatxonasi ustidan metro ko‘prigi qurilmoqda. Rohiblar bundan norozi
Toshkent shahrining Sergeli tumanida joylashgan buddistlar ibodatxonasi ustidan metro ko‘prigini qurish ishlari olib borilmoqda. Markaziy Osiyoda yagona bo‘lgan budda ibodatxonasi bosh rohibining o‘rinbosari bu bo‘yicha prezidentga murojaat bilan chiqqan.
Aleks Hegay o‘zining Facebook’dagi sahifasida yozishicha, quruvchilar 12-sentabr kuni hech qanday ogohlantirishsiz metro tayanchlari orasiga oraliq o‘tkazgichlar o‘rnatgan. Bu paytda hech kim ibodatxonada bo‘lmagan.
Izoh (0)