Ummondan O‘zbekiston Jinoyat kodeksining 135-moddasida nazarda tutilgan odam savdosida ayblanayotgan fuqaro ekstraditsiya qilindi. Bu haqda Interpolning O‘zbekistondagi Milliy markaziy byurosi xabar berdi.
Maʼlum qilinishicha, taqdim etilgan materiallar asosida fuqaro xalqaro qidiruvga eʼlon qilingan edi. Interpol kanallari orqali qidiruvdagi shaxsning Ummon hududida ekanligi aniqlangan. U joriy yilning aprel oyida ushbu mamlakatda hibsga olingan.
Bir oy oldin Toshkent Interpol Milliy markaziy byurosi xodimlarining hamrohligida Ummondan O‘zbekistonga ikki nafar jinoyatchi ayol ekstraditsiya qilingandi. Tashrif davomida olib borilgan muzokaralar natijasida O‘zbekiston Bosh prokuraturasining ayblanuvchini topshirish to‘g‘risidagi iltimosnomasini amalda bajarish bo‘yicha kelishuvga erishildi.
Islom Karimov nomidagi xalqaro aeroportda qidiruvda bo‘lgan shaxs Interpol Milliy markaziy byurosi va respublika huquqni muhofaza qilish organlari vakillariga topshirildi.
Sankt Peterburgda 2021-yilda sodir etilgan qotillik uchun qidiruvda bo‘lgan O‘zbekiston fuqarosi 28-may kuni Salvadordan ekstraditsiya qilingandi. O‘zbekistonda 9 million dollarni talon-toroj qilishda ayblangan shaxs Rossiyada ushlanib, 15-mayda O‘zbekistonga ekstraditsiya qilingandi. Shuningdek, O‘zbekiston Interpol Milliy markaziy byurosi xalqaro qidiruvda bo‘lgan jinoyatchi ayolni BAAdan chiqarib yuborgandi.
Izoh (0)