Уммондан Ўзбекистон Жиноят кодексининг 135-моддасида назарда тутилган одам савдосида айбланаётган фуқаро экстрадиция қилинди. Бу ҳақда Интерполнинг Ўзбекистондаги Миллий марказий бюроси хабар берди.
Маълум қилинишича, тақдим этилган материаллар асосида фуқаро халқаро қидирувга эълон қилинган эди. Интерпол каналлари орқали қидирувдаги шахснинг Уммон ҳудудида эканлиги аниқланган. У жорий йилнинг апрель ойида ушбу мамлакатда ҳибсга олинган.
Бир ой олдин Тошкент Интерпол Миллий марказий бюроси ходимларининг ҳамроҳлигида Уммондан Ўзбекистонга икки нафар жиноятчи аёл экстрадиция қилинганди. Ташриф давомида олиб борилган музокаралар натижасида Ўзбекистон Бош прокуратурасининг айбланувчини топшириш тўғрисидаги илтимосномасини амалда бажариш бўйича келишувга эришилди.
Ислом Каримов номидаги халқаро аэропортда қидирувда бўлган шахс Интерпол Миллий марказий бюроси ва республика ҳуқуқни муҳофаза қилиш органлари вакилларига топширилди.
Санкт Петербургда 2021 йилда содир этилган қотиллик учун қидирувда бўлган Ўзбекистон фуқароси 28 май куни Салвадордан экстрадиция қилинганди. Ўзбекистонда 9 миллион долларни талон-торож қилишда айбланган шахс Россияда ушланиб, 15 майда Ўзбекистонга экстрадиция қилинганди. Шунингдек, Ўзбекистон Интерпол Миллий марказий бюроси халқаро қидирувда бўлган жиноятчи аёлни БААдан чиқариб юборганди.
Изоҳ (0)