Toshkent shahrida 2025-yil boshidan jinoyat sodir etib, tergov va suddan qochib yashiringanligi sababli 2 461 nafar shaxsga nisbatan qidiruv e’lon qilingan. Bu haqda poytaxt IIBB matbuot xizmati xabar berdi.
Maʼlum qilinishicha, 860 nafar qidiruvdagi shaxs ushlangan.
Ularning 412 nafari 168-modda (firibgarlik), 123 nafari 169-modda (o‘g‘rilik), 45 nafari giyohvandlik bilan bog‘liq jinoyatlar, 32 nafari 167-modda (o‘zlashtirish yoki rastrata yo‘li bilan talon-toroj qilish), 24 nafari 277-modda (bezorilik), 17 nafari 166-modda (talonchilik), 7 nafari 104-modda (qasddan badanga og‘ir shikast yetkazish), 5 nafari 164 (bosqinchilik), 165 (tovlamachilik), 97-modda (qasddan odam o‘ldirish)lar va qolgan 185 nafari boshqa moddalarda nazarda tutilgan jinoyatlarni sodir etgan shaxslardir.
Yana 29 nafar qidiruvdagi fuqaro boshqa davlatlarda ushlanib, O‘zbekistonga ekstraditsiya qilingan. Shuningdek, MDH davlatlaridan 50 nafar qidiruvdagi shaxs ushlanib, O‘zbekistonga olib kelingan. Ulardan 44 nafari Rossiyada, 4 nafari Qozog‘istonda, 2 nafari Qirg‘izistonda ushlangan.
Jumladan, 1980-yilda tug‘ilgan I.G‘. 2009-yil dekabr oyida bosqinchilik jinoyatini sodir etgani uchun qidiruv e’lon qilingan. Qariyb 16 yil davomida qochib yurgan shaxs 2025-yilning 3-iyun kuni Moskvada ushlangan va Toshkentga olib kelinib, tergovga jalb qilingan.
Shu bilan birga, 1981-yilda tug‘ilgan A.F. 2024-yil may oyida o‘zlashtirish yoki rastrata yo‘li bilan o‘zgalar mulkini talon-taroj qilganlikda ayblanib, qidiruv e’lon qilingan edi. U 2025-yilning 15-aprel kuni Qozog‘istonning Chimkent shahrida qo‘lga olinib, Toshkentga olib kelindi.
Bundan tashqari, poytaxt IIBB Yagona tezkor boshqaruv markazi imkoniyatlaridan foydalangan holda 555 nafar qidiruvdagi shaxs ushlangan. Ulardan 399 nafari Toshkentda qidiruvga berilgan bo‘lsa, 156 nafari boshqa viloyatlarda qidiruvga berilgan shaxsdir. Ushbu qidiruvdagi shaxslar tomonidan jabrlanuvchilarga jami 22 mlrd 153 mln so‘m miqdorida moddiy zarar yetkazilgan bo‘lib, shundan 9 mlrd 535 mln so‘m miqdoridagi moddiy zarar qoplandi.
Yil boshidan Toshkent shahri hududida bedarak ketganlik holati bo‘yicha 3 183 ta murojaat kelib tushgan. Ushbu fuqarolarning 3 148 nafari bir necha soat ichida topilib, yaqinlari bag‘riga qaytarilgan.
35 nafar shaxs hozirgi kunda qidirilmoqda, ularning 22 nafari ruhiy kasallikka chalingan bo‘lib, o‘zi haqidagi ma’lumotni aytib berish imkoniga ega emas.
Sankt Peterburgda 2021-yilda sodir etilgan qotillik uchun qidiruvda bo‘lgan O‘zbekiston fuqarosi 28-may kuni Salvadordan ekstraditsiya qilingandi. O‘zbekistonda 9 million dollarni talon-toroj qilishda ayblangan shaxs Rossiyada ushlanib, 15-mayda O‘zbekistonga ekstraditsiya qilingandi. Shuningdek, O‘zbekiston Interpol Milliy markaziy byurosi xalqaro qidiruvda bo‘lgan jinoyatchi ayolni BAAdan chiqarib yuborgandi.
Izoh (0)