Bolalar ombudsmaniga 6-dekabr kuni Samarqand viloyatida yashovchi voyaga yetmagan F.U. (2010-yilda tug‘ilgan qiz bola) murojaat (telefon aloqa orqali) qildi. Bu haqda bolalar ombudsmani matbuot xizmati xabar berdi.
Maʼlum qilinishicha, voyaga yetmagan qiz o‘z murojaatida ota-onasining bir necha yil avval ajrimidan so‘ng hozirda otasi bilan aloqa yo‘qligi, onasi va akasi esa bugungi kunda jinoiy taʼqib ostida bo‘lib, ularga tergov vaqtida qamoq ehtiyot chorasi qo‘llangani sababli hozirda u mutlaqo yolg‘iz qolganligini bildirgan.
Holat bolalar ombudsmani tomonidan darhol o‘rganildi. Xususan, Ijtimoiy himoya agentligiga darhol kiritilgan so‘rov asosida bunday murakkab holatda bo‘lgan bolaning vaziyati tuman “Inson” ijtimoiy xizmatlar ko‘rsatish markazi tomonidan zudlik bilan o‘rganilib, qizga vaqtincha vasiy tayinlash chorasi ko‘rildi.
Hozirda voyaga yetmagan F.U. qarindoshlari qaramog‘iga topshirildi. Bolaning vaziyati vasiylik organi tomonidan nazorat qilinmoqda.
“Bolalar ombudsmani holat yuzasidan o‘z kuzatuvini davom ettiradi”, – deyiladi xabarda.
Izoh (0)