Сардор Рустамбоев Ўзбекистон Малдив Республикасидаги (қароргоҳи Деҳли шаҳрида жойлашган) биринчи элчиси этиб тайинланди. Бу ҳақда “Дунё” АА хабар берди.
Элчи бугун ушбу мамлакат президенти Муҳаммад Муиззуга ишонч ёрлиқларини топширди.
Тантанали маросимдан сўнг бўлиб ўтган суҳбат чоғида Ўзбекистон ва Малдив ўртасидаги сиёсий, савдо-иқтисодий, инвестициявий, маданий-гуманитар ва бошқа соҳалардаги муносабатларнинг ҳозирги ҳолати ҳамда келажакдаги ривожланиш истиқболлари муҳокама қилинди.
Томонлар ижтимоий-иқтисодий ҳаётнинг турли йўналишларида икки томонлама ҳамкорликни янада ривожлантириш учун катта имкониятлар мавжудлигини таъкидлади.
Президент Муҳаммад Муиззу Малдив Ўзбекистон билан БМТ, ИҲТ, бошқа халқаро ва минтақавий ташкилотлар доирасида томонларни қизиқтирган масалалар, жумладан, иқлим ўзгариши, барқарор ривожланиш ҳамда минтақавий хавфсизлик бўйича ҳамкорликни янада мустаҳкамлашга тайёрлигини билдирди.
Алоҳида эътибор туризм ва олий таълим йўналишида шерикликни ривожлантиришга қаратилди. Хусусан, Ўзбекистон олий таълим муассасаларида Малдив талабаларини ўқитиш истиқболлари муҳокама қилинди. Икки давлат ўртасида тўғридан-тўғри рейсларни очиш, виза режимини соддалаштириш ва қўшма саёҳат пакетларини ишлаб чиқиш имкониятларини кўриб чиқишга келишилди.
Томонлар олий ва юқори даражадаги ташрифлар ташкил қилиш, тадбиркорлар ҳамда бошқа соҳа вакиллари делегациялари алмашинувини йўлга қўйиш юзасидан фикр билдирди.
Маълумот учун, Ўзбекистон ва Малдив Республикаси ўртасидаги дипломатик муносабатлар 1994 йил 7 декабрь куни ўрнатилган.
Сардор Рустамбоев Деҳлида 2024 йил январь ойида ўз фаолиятини бошлаган. Бундан олдин у Ўзбекистоннинг Франция ва Португалиядаги дипломатик ваколатхонасига раҳбарлик қилган.
Изоҳ (0)