Fransiyaning Shri-Lanka va Maldiv orollaridagi elchisi 53 yoshli Jan-Fransua Pakte Kolombodagi qarorgohida o‘lik holda topildi. Bu haqda Shri-Lanka tashqi ishlar vazirligi matbuot xizmati xabar berdi.
Vazirlik voqea munosabati bilan chuqur hamdardlik bildirdi, shuningdek, Fransiya Tashqi ishlar vazirligi va marhumning oilasiga har tomonlama yordam ko‘rsatishga va’da berdi. Bayonotda diplomatning o‘limi sabablari aytilmagan.
Politsiyaning mahalliy Lankasara nashriga xabar berishicha, diplomat o‘z qarorgohida vafot etgan. 26-may kuni ertalab u odatdagidek tashqariga chiqmagan va diplomatik missiya xodimlari bilan bog‘lanmagan. Yakshanba dam olish kuni bo‘lgani uchun elchixona xodimlari biroz kutgan, keyin esa politsiya bilan bog‘lanishgan. Qarorgohga kirgan politsiya diplomatning jasadini zo‘ravonlik izlarisiz topgan. Ehtimol, diplomatning sog‘lig‘i birdan yomonlashgan bo‘lishi mumkin.
Jan-Fransua Pakte 2022-yil oktyabr oyidan buyon Shri-Lanka va Maldiv orollaridagi Fransiya elchixonasini boshqarib kelayotgandi. Ilgari u Fransiya Tashqi ishlar vazirligida madaniyat va ta’lim bo‘yicha direktor o‘rinbosari lavozimida ishlab, xorijda fransuz tili va madaniyati markazlari tarmog‘ini rivojlantirishga mas’ul bo‘lgan.
2016-yildan 2019-yilgacha Pakte vazirlikning global sog‘liqni saqlash, gender tengligi va ta’lim siyosati uchun mas’ul bo‘lgan va Fransiyaning ushbu sohalardagi ko‘p tomonlama fondlarga ajratgan mablag‘larini nazorat qilgan.
Izoh (0)