Hind okeanidagi Maldiv orollari mamlakati 13-may kuni Janubiy Afrika respublikasining Xalqaro jinoyat sudidagi Isroilga qarshi genotsid ishi bo‘yicha daʼvosiga qo‘shilganini maʼlum qildi. Bu haqda Al Jazeera nashri xabar berdi.
Manbada aytilishicha, Maldiv orollari hukumati Isroilni G‘azo sektorida genotsid konvensiyasi bo‘yicha o‘z majburiyatlarini buzganlikda ayblagan. Xalqaro jinoyat sudida mamlakat Janubiy Afrika bilan bitta pozitsiyada turishini maʼlum qilgan.
Maldiv orollari prezidenti administratsiyasi ushbu bayonotni rasman tasdiqlagan va eʼlon qilgan. Isroilni mamlakat aholisi uchun sunʼiy qo‘rquv muhiti yaratib, G‘azo aholisi ichida qirg‘in uyushtirishda ayblagan.
“Xavfsizlik niqobi ostida Isroil bosqinchi kuchlari tomonidan amalga oshirilgan genotsid harakatlari, ommaviy ko‘chirish, ocharchilik va insonparvarlik yordami to‘silishi ushbu qarorni imzolashga turtki bo‘ldi”, — deyiladi mamlakat rasmiylari eʼlon qilgan xabarda.
Maldiv rasmiylari, shuningdek, Isroilning Rafahga keng ko‘lamli hujumini ham qoralagan. Boshpana izlayotgan minglab tinch aholini zudlik bilan evakuatsiya qilish talablari Xalqaro jinoyat sudi buyurgan vaqtinchalik choralarga amal qilinmayotganidan dalolat ekanligi maʼlum qilingan.
Maʼlumot o‘rnida, Maldiv orollari Hindistondan janubda, Hind okeanida joylashgan mamlakat. Ushbu hudud musulmonlar yashaydigan eng kichik davlat hisoblanadi. Mamlakat aholisi soni 500 mingdan ko‘proq ekani aytiladi. Mamlakat poytaxti Male shahridir. Ushbu orol mamlakat 2020-yildan keyingi davrda Hindiston va Xitoy o‘rtasida iqtisodiy va harbiy hamkorlik uchun kurash nuqtasiga aylangan.
Izoh (0)