Xitoy Maldiv bilan harbiy shartnoma imzoladi

Maldiv hukumati Xitoy bilan harbiy yordam to‘g‘risidagi shartnomani imzoladi. Bu haqda Anadolu nashri xabar berdi.

Maldiv orollari prezidenti Muhammad Muizzu o‘z mamlakatida hech qanday hind harbiylari bo‘lmaydi, degan pozitsiyasi sari qatʼiy harakat qilmoqda. Hukumat bu maqsadiga erishish uchun Xitoy yordamida mudofaa tizimini kuchaytirmoqchi.

Mamlakat Mudofaa vazirligiga ko‘ra, mudofaa rahbariyati boshlig‘i Muhammad G‘assan Maumun va Xitoyning harbiy hamkorlik bo‘yicha rasmiysi general mayor Chjan Baoqun ikki tomonlama aloqalarni mustahkamlagan holda “Xitoyning Maldiv orollariga bepul harbiy yordam ko‘rsatishi to‘g‘risida bitim” imzolagan. Bu shartnomaga muvofiq Xitoy kapitali va texnikasi Maldiv hukumati harbiy soha va tarmoqlariga yo‘naltiriladi.

Xitoy bilan shartnoma imzolangandan keyin Maldiv rasmiylari jiddiy bayonot eʼlon qilgan. Unga ko‘ra, 10-maydan keyin mamlakat hududida birorta ham hind harbiysi qolishiga ruxsat berilmaydi. Ushbu sanagacha oroldagi barcha hind harbiy kontingenti qitʼaga qaytgan bo‘lishi kerak.

Maldiv orollari oldinroq Hindiston hukumatidan 88 nafar askarini oroldan olib ketishini so‘ragan. Hindiston esa bunga javob qaytarmagan.