Ular katta boylik orttirdilar, afsonaga aylandilar va farzandlariga millionlab dollar qoldirishlari mumkin edi. Ammo barcha mashhurlar ham o‘z mol-mulkini farzandlariga qoldirishni istamaydi. Baʼzi taniqli shaxslar ongli ravishda o‘z avlodlariga meros qoldirishdan voz kechadilar, buning sababini ularni mustaqil va mehnatsevar qilib tarbiyalash istagi bilan izohlaydilar. Boshqalari shaxsiy kelishmovchiliklar tufayli meros qoldirishni xohlamaydi, baʼzilari esa umr bo‘yi topgan barcha pullarini xayriya ishlariga sarflashni rejalashtiradi. Ushbu maqolada biz farzandlarini merossiz qoldirishga qaror qilgan aktyorlarning hikoyalarini ko‘rib chiqamiz va nima uchun bunday yo‘l tutganliklarini tushunishga harakat qilamiz.

Kirk Duglas

“Spartak” va “Hayotga tashnalik” filmlari yulduzi 2020-yilda 103 yoshida vafot etdi. Uning boyligi taxminan 61 million dollarga baholangan edi. Uni farzandlariga, jumladan, aktyor Maykl Duglasga qoldirish o‘rniga, u mablag‘ning katta qismini — taxminan 50 million dollarni 1964-yilda rafiqasi Enn bilan birga asos solgan Duglas jamg‘armasiga vasiyat qildi.

Ushbu jamg‘arma turli xayriya tashkilotlarini, jumladan, Los-Anjeles bolalar shifoxonasi va Sent-Lourens universitetini qo‘llab-quvvatlaydi. Ko‘chmas mulkka kelsak, Duglasning Beverli-Xillzdagi uyi bor edi, u vafotidan so‘ng to‘qqiz million dollarga sotildi.

Shon Konneri

Jeyms Bond roli bilan tanilgan Shon Konneri 2020-yilda vafot etdi. Uning boyligi taxminan 350 million dollar deb baholangan. Konneri hayotligidayoq o‘g‘li Jeysonni merosdan mahrum qilish niyatini ochiq aytgan edi. Shunday qilib, u o‘g‘liga barcha pulni o‘zi ishlab topish kerakligi haqida saboq bermoqchi bo‘lgan. 2007-yilda aktyor 45 yoshli o‘g‘li otasining moliyaviy yordamiga qaram bo‘lmasligini istashini ommaga maʼlum qilgan.

Jeki Chan

Afsonaviy xitoylik aktyor Jeki Channing boyligi taxminan 400 million dollarni tashkil etadi. Bundan tashqari, u AQSH, Avstraliya, Gonkong, Singapur va Xitoyda bir nechta ko‘chmas mulkka ega.

U shunday degan: “Agar qobiliyati bo‘lsa, o‘zi ishlab topadi pulni. Agar yo‘q bo‘lsa, shunchaki mening pulimni sarflaydi”. Bu qaror, shuningdek, 2014-yilda Jeysining taqiqlangan moddalarni saqlash uchun hibsga olinganidan keyin ota va o‘g‘il o‘rtasidagi keskinlashgan munosabatlar bilan ham bog‘liq.

Filip Seymur Xoffman

“Oskar” mukofoti sohibi, aktyor Filip Seymur Xoffman 2014-yilda vafot etgan hamda o‘zidan keyin 35 million dollarlik meros qoldirgan. Xoffmanning vasiyatnomasida uning barcha boyligini faqat bitta odam — uzoq yillik do‘sti va liboslar bo‘yicha rassom Marianna O‘Donnell olishi ko‘zda tutilgan edi. Eʼtiborli tomoni shundaki, juftlikning uch nafar farzandi bo‘lishiga qaramay, aktyor ularni vasiyatnomaga kiritmagandi. Uning hisobchisining aytishicha, Xoffman merosxo‘rlari “maqsadli jamg‘arma farzandlari” hissini boshdan kechirishlarini istamagan.

Deniel Kreyg

Farzandlarini merosdan mahrum qilishga qaror qilgan yana bir Jeyms Bond. Uning boyligi 160 million dollarga baholanmoqda. Bundan tashqari, Kreyg va uning rafiqasi, aktrisa Reychel Vays bir nechta ko‘chmas mulkka egalik qiladi, jumladan: Londondagi uy, Nyu-Yorkdagi pentxaus va Bruklindagi taunxaus.

Aktyor meros qoldirishni “jirkanch” deb hisoblab, o‘z boyligini tirikligida sarflashni yoki xayriya ishlariga yo‘naltirishni rejalashtirmoqda.