Qozog‘istonda ayol TikTok’ka joylagan videosi tufayli millatlararo adovat qo‘zg‘atganlikda ayblanib, ikki yilga ozodlikdan mahrum qilindi. Bu haqda “Ozodlik” radiosi xabar berdi.
Jansulu Darxambayeva ijtimoiy tarmoqqa video joylab, unda Rossiya prezidenti Vladimir Putinga murojaat qilgandi. U 2025-yilda Rossiya Qozog‘istondan ijaraga olgan yerlar muddati tugashini aytib, “bu yerlarni qaytarish”ni talab qilgan. Shuningdek, Qozog‘istonning chegaradosh hududlarini Rossiyadan qaytarib olish kerakligi haqida gapirgan.
Oradan bir necha oy o‘tib, u millatlararo adovat qo‘zg‘atganlikda ayblanib sudga tortilgan. Ekspertiza videoda “rus millatiga mansub fuqarolarning milliy sha’ni va qadr-qimmatini tahqirlash (kamsitish) belgilarini” ko‘rgan.
Sud Darxambayeva bu videoni “ataylab joylagan, uning rus millatiga qarata aytgan so‘zlari keng ommaga tarqalishi mumkinligini tushungan va bu bilan ijtimoiy adovat qo‘zg‘atishni maqsad qilgan” degan xulosaga kelgan. Ish hujjatlarida ayblanuvchining “aybiga to‘liq iqror bo‘lgani va qilmishidan chin dildan pushaymon ekani” ham qayd etilgan.
2025-yil 20-may kuni Petropavlovsk shahrida o‘tgan sud Darxambayevani ikki yilga ozodlikdan mahrum qilishga hukm qilgan. U to‘g‘ridan-to‘g‘ri sud zalida qo‘lga olinib, tergov izolyatoriga yuborilgan.
Ayolning ukasi sud hukmini insonparvarlik va adolat tamoyillariga zid deb atagan. Uning aytishicha, sud bu qarorni “jamoatchilik rezonansi” asosida chiqargan, holbuki ijtimoiy tarmoqlarda ko‘pchilik Darxambayevani qo‘llab-quvvatlagan. Ayolning advokati Kabdolaxmet Iskandirov esa apellyatsiya tartibida shikoyat kiritganini aytgan.
Izoh (0)