Hukumat qarori bilan O‘zbekistonda kadastr pasportlarini berish muddatlari uzaytirildi.
Vazirlar Mahkamasining “O‘zbekiston Respublikasining ‘O‘zboshimchalik bilan egallab olingan yer uchastkalariga hamda ularda qurilgan binolar va inshootlarga bo‘lgan huquqlarni e’tirof etish to‘g‘risida’gi qonunini amalga oshirish bo‘yicha qo‘shimcha chora-tadbirlar haqida”gi qarori qabul qilindi.
Hujjat bilan Ko‘chmas mulk obyektiga kadastr pasportini berish bo‘yicha davlat xizmatlari ko‘rsatishning ma’muriy reglamentiga o‘zgartirishlar kiritildi. Unga ko‘ra, pasportni tayyorlash muddati uzaytirildi.
Xususan, u obyektning murakkabligiga qarab:
- ko‘p kvartirali uylardagi kvartiralar uchun — 5 ish kunigacha (avval 3 ish kunigacha edi);
- yakka tartibdagi uy-joy uchun — 8 ish kunigacha (avval 5 ish kunigacha edi) bo‘lgan muddatda tayyorlanadi.
Ko‘chmas mulk obyektlarining yashash uchun mo‘ljallanmagan qismi va umuman ko‘p kvartirali uy bo‘yicha:
- umumiy maydoni 100 kv. metrgacha — 8 ish kuni;
- 100 dan 1000 kv. metrgacha — 10 ish kunigacha;
- 1000 dan 5 000 kv. metrgacha — 15 ish kunigacha;
- 5000 dan 15 000 kv. metrgacha — 20 ish kunigacha;
- 15000 dan 50 000 kv. metrgacha — 26 ish kunigacha;
- 50 000 kv. metrdan ortiq bo‘lganda — 35 ish kunigacha muddatda tayyorlanadi.
Ko‘p yillik dov-daraxtlar joylashgan yer uchastkasi bo‘yicha quyidagi muddatlarda tayyorlanadi:
- umumiy maydoni 1 gektargacha — 15 ish kunigacha;
- umumiy maydoni 1 gektardan 5 gektargacha — 20 ish kunigacha;
- umumiy maydoni 5 gektardan 10 gektargacha — 26 ish kunigacha;
- umumiy maydoni 10 gektardan 100 gektargacha — 35 ish kunigacha;
- umumiy maydoni 100 gektardan ortiq — 40 ish kunigacha.
Vazirlar Mahkamasi qarorida belgilanishicha, Kadastr agentligi tegishlicha ijara va mulk huquqini e’tirof etish maqsadida ko‘rib chiqiladigan yer uchastkasining, binoning va inshootning elektron yig‘majild hujjatlarini ushbu yer uchastkasi bino va inshootlar bilan band bo‘lgan taqdirdagina avtomatlashtirilgan axborot tizimiga joylashtiradi. Bunda yer uchastkasining chegarasi ko‘chmas mulk obyekiga kirish qismidan boshlab aniqlanadi.
Izoh (0)