Toshkent viloyatining Bo‘stonliq tumanidagi yer oldi-sotdisi bo‘yicha noqonuniy holatlar aniqlanib, jinoyat ishlari qo‘zg‘atildi.
Davlat xavfsizlik xizmatining Toshkent viloyati bo‘yicha boshqarmasi xodimlari tomonidan Bosh prokuratura huzuridagi departament bilan hamkorlikda o‘tkazilgan tezkor tadbirda, Bo‘stonliq tumanida yashovchi, 1980 va 1988-yillarda tug‘ilgan 2 nafar shaxs o‘zaro kelishgan holda, mazkur tuman hokimligi tomonidan bog‘dorchilik va uzumchilikka ixtisoslashgan shirkatning 2 nafar a’zosiga dalahovli qurish maqsadida ajratib berilgan 20 sotix yer maydonini xaridor nomiga rasmiylashtirib berish evaziga 230 ming dollar olgan vaqtida ashyoviy dalillar bilan ushlangan.
Shuningdek, tezkor tadbir davom ettirilib, o‘zini go‘yoki ushbu yer uchastkasining egasi deb tanishtirgan, 1964-yilda tug‘ilgan fuqaro ham yer maydonini xaridor nomiga o‘tkazib berish evaziga ushbu 230 ming dollarni olgan vaqtida qo‘lga tushgan.
Bo‘stonliq tumanida qayd etilgan yana bir holatda, 1996-yilda tug‘ilgan shaxs o‘zining qarindoshiga tuman hokimligining 2008-yildagi qaroriga asosan Chirchiq daryosining muhofaza zonasidan obodonlashtirish hamda qayiqlar to‘xtash joyi barpo etish uchun ajratib berilgan 36 sotix yer maydonini 150 ming dollarga sotishga kelishib, shuningdek, kadastr tizimida ishlovchi tanishlari orqali tegishli hujjatlarni rasmiylashtirib berish evaziga 10 ming dollar talab qilib, jami 160 ming dollar olgan vaqtida ashyoviy dalillar bilan ushlangan.
Boshqa holatda esa Toshkent shahrida yashovchi, 1992-yilda tug‘ilgan shaxs o‘zganing ishonchiga kirib, unga Bo‘stonliq tumanida joylashgan va 8 nafar fuqaroga tegishli bo‘lgan 72,6 sotix noturar yer maydonining har bir sotixini 14 900 dollardan hisoblab, jami 1 million 81 ming 740 dollarga sotishga kelishgan.
Shuningdek, mansabdor tanishlari orqali ushbu yer maydonini turar joy toifasiga o‘tkazib, u yerda ko‘p qavatli uy qurish uchun ruxsat olib berish evaziga 10 ming dollar talab qilgan. Ammo Davlat xavfsizlik xizmati, Iqtisodiy jinoyatlarga qarshi kurashish departamenti va ichki ishlar organlari xodimlari tomonidan o‘tkazilgan tezkor tadbirda, u oldindan 110 ming dollarni olgan vaqtida ushlangan.
Hozirda mazkur shaxslarga nisbatan jinoyat ishlari qo‘zg‘atilib, tergov harakatlari olib borilmoqda.
So‘nggi oylarda yerni noqonuniy sotishga urinish holatlari
2025-yil mart oyining boshlarida Navoiy, Andijon, Farg‘ona va Toshkent viloyatlarida yer maydonlarini noqonuniy sotmoqchi bo‘lganlar ushlanib, jinoyat ishlari qo‘zg‘atilgandi. Xususan, poytaxtda yashovchi fuqaro Toshkent tumanida joylashgan va davlat zaxirasida bo‘lgan 16 sotix yerni 352 ming dollarga xaridorga sotishga kelishib hamda yuqori lavozimda ishlovchi tanishlari orqali uning nomiga rasmiylashtirib berishni va’da qilib, oldindan 30 ming dollari olgan vaqtida ushlangan. 26-mart kuni Samarqandda davlat zaxirasidagi 2 gektar yerni 100 million so‘mga sotmoqchi bo‘lgan shaxs qo‘lga tushgani xabar qilingandi.
Fevral oyida Farg‘onada fuqaro 2,5 gektar yerni 650 ming dollarga sotishga kelishib, oldindan 100 ming dollarni olgan vaqtida ashyoviy dalillar bilan ushlangandi. Toshkent viloyati Ohangaron tumanida joylashgan va qishloq xo‘jaligiga mo‘ljallangan 32 gektar yerni 2,4 mln dollarga noqonuniy sotmoqchi bo‘lgan shaxs qo‘lga olingandi.
Surxondaryo viloyatida qishloq xo‘jaligiga mo‘ljallangan 45 sotix yerni 60 ming dollarga sotishga kelishib, 56,7 ming dollar va 43 million so‘m olgan vaqtida qo‘lga tushgandi. Xorazm viloyatining Urganch tumanida fuqaro davlat zaxirasida bo‘lgan 24 sotix yer maydonini kadastr tizimida ishlovchi tanishlari orqali xaridor nomiga rasmiylashtirib berish evaziga 45 ming dollar va 13 million so‘m olgan vaqtida ushlangandi.
Izoh (0)