Joriy yilning 22-may kuni Toshkentda xalqaro fintex-hodisa – Visa Cashless Forum 2025 bo‘lib o‘tdi. Forum to‘lovlar sohasi va bank sektori kelajagi borasidagi muhokamalar uchun asosiy maydon bo‘lib xizmat qildi. Tadbir raqamli to‘lovlar sohasidagi dunyo yetakchisi – Visa kompaniyasi tomonidan tashkil etildi.
Kelajak innovatsiyalari va O‘zbekistonning raqamli transformatsiyasiga bag‘ishlangan plenar sessiyani ochib berar ekan, Visaning O‘zbekistondagi mintaqaviy boshqaruvchisi Bexzod Abdurahmonov quyidagilarni ta’kidlab o‘tdi: “Bugungi kunda O‘zbekiston noyob transformatsiya bosqichini boshdan kechirmoqda. So‘nggi yillarda mamlakat raqamli iqtisodiyot tomonga, ayniqsa to‘lovlar sanoatida dadil qadamlar tashladi. Bu shunchaki trend emas, biznes, davlat va aholi uchun yangi ufqlarni ochuvchi strategik tanlovdir”.
Bank sektorining asosiy o‘yinchilari ishtirokidagi sessiyada raqamli transformatsiya amaliyoti va zamonaviy to‘lov muhitini yaratish uchun amalga oshirilgan aniq choralar muhokama qilindi.
Ipak Yuli Bank boshqaruv raisi o‘rinbosari Baxtiyor Alimov raqamlashtirishga uzoq muddatli yondashuvning ahamiyatini ta’kidlab o‘tdi: “Raqamlashtirish – bu nafaqat trend, balki strategik yo‘nalishdir, ayniqsa, gap yoshlar haqida ketganda. Bu birinchi navbatda mo‘ljal olish kerak bo‘lgan segmentdir. Biz Ipak Yuli Bankda shunchaki ommaviy mahsulot ishlab chiqarishga emas, mijozlarimiz uchun haqiqatda nima muhim ekanligini tushunishga intilamiz. Shu sababdan biz uzoq muddatli, ma’lumotlar, mijozlar va raqamli kelajakka mo‘ljallangan yondashuvimizni aks ettiruvchi qator tashabbuslarni ishga tushirdik. Masalan, Visa Start Sum – bu ilk so‘mdagi karta bo‘lib, u bilan avtomatik valyuta konvertatsiyasi, pulni naqdlashtirish imkoniyatlari va layfstayl-chegirmalar orqali O‘zbekistonda ham, undan tashqarida ham har kunlik xaridlarni qulay amalga oshirish mumkin. Birinchi uch oyda kredit kartalari limitlari 100 mlrd so‘mdan oshdi. Yana bir yorqin misol – Woman Card. U butun ekotizim bo‘lib, 2,5 oy davomida undan 23 mingdan ziyod ayollar foydalandi. Karta do‘konlar, salomatlik, kafe, restoranlar va boshqa xizmatlarga 55 foizgacha chegirmalar beradi. Biz mijozga uning kundalik hayotida hamrohlik qiluvchi bank bo‘lishni istaymiz”.
Xususiy bank sektorining yetakchilaridan biri Kapital Bankning kuzatuv kengashi a’zosi Kirill Markevich quyidagilarni ta’kidladi:
“Transformatsiya va moliya sanoati kelajagi haqida gap ketganda ko‘pincha moliyaviy texnilogiyalar yodga olinadi, ammo aynan banklar ushbu o‘zgarishlar yadrosiga aylanishi mumkin. Kapital bankdagi yangi yo‘nalish bu Bank-as-a-Service “Bank xizmat kabi”dir. Bu IT-tizimdagi modul emas, aniq mahsulot, hamkorlikdagi model va texnologik platformani talab etuvchi mustaqil biznes-yo‘nalish.
Eng muhimi — bank shunchaki “mahsulotlar peshtahtasi” emas, o‘zgalar muvaffaqiyatining yadrosi bo‘lishga tayyor bo‘lishi lozim. BaaS — bu o‘rta asrlardagi baland devor bilan o‘ralgan, atrofi jarlikdan iborat qasr emas, balki aeroport, xabdir. U o‘zi chipta sotmasa-da, har kuni o‘nlab aviakompaniyalar va ularning minglab yo‘lovchilariga xizmat ko‘rsatadi. Yo‘lovchining har bir harakatida uning uchun manfaat bor. Shuningdek, bank infratuzilmasi ham o‘z rolini o‘zgartirib, izolyatsiya qiluvchidan birlashtiruvchiga o‘zgarmoqda.
Zero, ertaga bo‘limlari ko‘proq, mobil ilovasi chiroyliroq bo‘lgan bank emas, odamlarning kundalik hayotiga yaqinroq kirib borgan bank yutadi. Bank mijozni jalb qilishga urinmasdan, mijoz bor joyga kelishi bu mutlaqo o‘zgacha mantiq. Kelganda ham raqobatchi rolida emas, ixtisoslashgan, murakkab, og‘ir va boshqa bizneslarga xos bo‘lmagan yadro rolida”.
InfinBANK boshqaruv raisi o‘rinbosari Ruslan Karimov bankning raqamlashtirishga bo‘lgan strategik yondashuvi va mijozlarning haqiqiy ehtiyojlari atrofiga qurilgan xizmatlarni yaratishning muhimligi haqida so‘zladi:
“Bugungi raqamli kun tartibi shunchaki trend bo‘lib qolmay, biz har kuni birga yashaydigan korporativ boshqaruvning bir qismidir. Biz InfinBANKda raqamlashtirishga mijoz yo‘li prizmasi orqali qaraymiz. Masalan, bankning ehtimoliy mijozi faol sayyoh bo‘lishi mumkin. U bank, sug‘urta, elchixona kabi ko‘plab muassasalar bilan to‘qnash keladi va ushbu yo‘l imkon boricha oddiy bo‘lishi muhim. Yagona kirish nuqtasi bo‘la oladigan va mijoz uchun sezilarli qiymatni yarata oladigan banklar haqiqatda raqobatbardosh bo‘ladi. Biz, shuningdek, ichki operatsion samaradorlikni oshirish uchun raqamli yechimlarni faol rivojlantiryapmiz va bu boradagi natijalar ko‘p narsani ayta oladi: bizning kredit konveyerimiz 2023 yilda chakana blokda 90 mingta ariza ustida ishlagan bo‘lsa, 2024 yilda bu ko‘rsatkich 500 ming arizaga oshdi. Raqamli transformatsiyaga tizimli yondashuvning natijasi aynan shudir”.
Sessiya yakunida Visa vakili ishtirokchilarga ochiq muloqot uchun minnatdorlik izhor qildi va faqatgina banklar, fintex-kompaniyalar va davlat tuzilmalari bilan hamkorlikda raqamli moliya sohasida mustahkam o‘zgarishlarga erishish mumkinligiga ishonch bildirdi.
“Bizning vazifamiz – faqatgina zamon bilan hamnafas bo‘lish emas, balki kelajakni hozir yaratish, – deya ta’kidladi Bexzod Abduraxmonov. – Aynan shuning uchun biz asosiy e’tiborni keng ko‘lamlilik, qulaylik va innovatsiyalarga qaratamiz. Biz O‘zbekistonning to‘lov ekotizimini rivojlantirishga yordam beradigan g‘oyalar, tashabbuslar va hamkorlikdagi loyihalarga ochiqmiz”.
Reklama huquqi asosida.
Izoh (0)