Vazirlar Mahkamasining 6-maydagi “O‘zbekiston Respublikasi saylovchilarining Yagona elektron ro‘yxatini shakllantirish va yuritish tartibi to‘g‘risidagi nizomga o‘zgartirish va qo‘shimchalar kiritish haqida”gi 286-son qarori qabul qilindi, deb xabar beradi Norma.
Saylov kodeksiga, shuningdek, Prezidentning “Saylov jarayoniga zamonaviy axborot-kommunikatsiya texnologiyalarini joriy etish chora-tadbirlari to‘g‘risida” 2018-yil 4-oktabrdagi PQ-3961-son qaroriga muvofiq O‘zbekiston saylovchilarining Yagona elektron ro‘yxatini shakllantirish va yuritish tartibi to‘g‘risidagi nizomga o‘zgartirish va qo‘shimchalar kiritiladi.
Xususan, 2-band quyidagi kichik band bilan to‘ldirilgan:
O‘zbekiston fuqarosining pasporti (agar saylovchi fuqaro chet davlatda bo‘lsa, xorijga chiqish pasporti yoki diplomatik pasporti) yoki identifikatsiya ID-kartasi seriyasi va raqami, jismoniy shaxsning shaxsiy identifikatsiya raqami, familiyasi, ismi, otasining ismi (davlat tilida, lotin yozuvida), tug‘ilgan sanasi, doimiy yoki vaqtincha istiqomat qilayotgan fuqarolarning yashash joyi manzili va uning kadastr raqami Vazirlar Mahkamasi huzuridagi Davlat personallashtirish markazi tomonidan taqdim etiladigan axborotlar hisoblanadi.
Bundan tashqari, 4 “d”-bandda aniqlashtirilishicha, Tashqi ishlar vazirligi chet davlatlardagi diplomatik va boshqa vakolatxonalari huzurida tuzilgan uchastka saylov komissiyalari tomonidan saylovchilar ro‘yxatiga kiritilgan o‘sha davlat hududida turgan O‘zbekiston fuqarolari to‘g‘risida axborotlarni taqdim etadi.
9-band quyidagi kichik bandlar bilan to‘ldirildi:
- Davlat soliq qo‘mitasi huzuridagi Kadastr agentligi — fuqarolarning ko‘chmas mulk obyektlari kadastr raqamlari, ular joylashgan manzili va geolokatsiya to‘g‘risida axborotlarni taqdim etadi;
- Favqulodda vaziyatlar vazirligi, Davlat bojxona qo‘mitasi, Milliy gvardiya oliy harbiy ta’lim muassasalarida ta’lim olayotgan fuqarolar to‘g‘risida — saylov boshlanishidan uch oy avval, muddatli harbiy xizmatni o‘tayotgan fuqarolar to‘g‘risida esa — saylov boshlanishidan 4 oy avval axborotlarni taqdim etadi.
Hujjat bilan boshqa o‘zgartirishlar va qo‘shimchalar nazarda tutilgan. Hujjat qonun hujjatlari ma’lumotlari milliy bazasida e’lon qilingan va 2021-yil 7-maydan kuchga kirgan.
Mavzuga doir:
Qonundagi bandlardan biri bilan Prezident, Qonunchilik palatasi, Qoraqalpog‘iston Jo‘rqorg‘i Kengesi, shuningdek, viloyatlar, tumanlar va shaharlar davlat hokimiyati vakillik organlari uchun o‘tkaziladigan saylovlar sanasi dekabr oyining uchinchi o‘n kunligining birinchi yakshanbasidan oktabr oyining uchinchi o‘n kunligining birinchi yakshanbasiga ko‘chirildi (2021-yilda ushbu sana 24-oktabrga to‘g‘ri kelmoqda).
Prezident Shavkat Mirziyoyev 29-dekabr kuni Oliy Majlisga yo‘llagan Murojaatnomasida 2021-yilda o‘tkaziladigan “davlat va xalq hayotidagi muhim siyosiy hodisa” — prezidentlik saylovlari masalasiga to‘xtalib o‘tgandi. O‘shanda Shavkat Mirziyoyev Markaziy saylov komissiyasi “bo‘lajak saylovlarning milliy qonunchilik va umume’tirof etilgan xalqaro demokratik tamoyillar asosida yuksak saviyada tashkil etilishiga alohida e’tibor qaratishi” lozimligini ta’kidlagandi.
Izoh (0)