Qashqadaryo viloyatining Shahrisabz tumanida 11 mingdan ortiq daraxtga kadastr pasporti berildi. Bu haqda “Daryo”ga Davlat kadastrlari palatasi Qashqadaryo viloyati boshqarmasi axborot xizmati Namoz Choriyev xabar berdi.
Maʼlum qilinishicha, Shahrisabz tumanining “Ravot” mahallasida joylashgan “O‘ktam Choriyorovich” fermer xo‘jaligining ko‘p yillik dov-daraxtlariga kadastr pasportini shakllantirish va ularga bo‘lgan huquqni davlat ro‘yxatidan o‘tkazish to‘g‘risidagi ariza Davlat kadastrlari palatasi Shahrisabz tumani filiali tomonidan ijobiy hal etilgan.
“Qisqa muddatda kadastr xodimlari tomonidan 12 gektardan ziyod bog‘zordagi 11 171 dona daraxtga kadastr pasporti tayyorlab berildi. Mazkur jarayonda ko‘p yillik dov-daraxtlarning turlari, soni va ularning egallagan maydoni to‘g‘risidagi maʼlumotlar shakllantirilib, davlat ro‘yxatidan o‘tkazildi. Kadastr pasporti davlat xizmatlari markazi orqali mulkdorga taqdim etildi”, — deydi Namoz Choriyev.
Qo‘shimcha qilinishicha, ko‘p yillik dov-daraxtlarga kadastr pasportini shakllantirish va ularga bo‘lgan huquqlarni davlat ro‘yxatidan o‘tkazish uchun davlat xizmatlari markazi yoki “my.gov.uz” portali orqali ariza beriladi.
“Daraxtlarga kadastr pasportini tayyorlash besh ish kunida, ularga bo‘lgan huquqni davlat ro‘yxatidan o‘tkazish esa ikki ish kunida amalga oshiriladi. Xizmat narxi BHMning 1 baravari va har bir gektar dov-daraxtlar bilan egallangan yer uchastkasi uchun BHMning 7 foizini tashkil qiladi”, — deydi Namoz Choriyev.
Izoh (0)