Multivitaminlar organizmni tez tiklash usuli bo‘lib ko‘rinadi. Ammo ularni qon tahlilisiz, tanadagi yetishmovchiliklarni tushunmasdan va shifokor bilan maslahatlashmasdan qabul qilish mumkin emas.
Hatto foydali vitaminlarni ham pala-partish, bir vaqtda va o‘zaro ta’sirini tushunmasdan qabul qilsangiz, bir-biriga xalaqit berishi mumkin.
Birgalikda qabul qilish tavsiya etilmaydigan birikmalar:
- Kalsiy va temir. Bu suyaklar va quvvatni saqlash uchun klassik kombinatsiya bo‘lib tuyuladi. Biroq bu ikki mineral ichakda bir-biri bilan raqobatlashadi. Oqibatda ikkalasi ham to‘liq o‘zlashtirilmaydi. Ularni qabul qilish orasida kamida 4-6 soat tanaffus qilgan ma’qul.
- Magniy va rux (yuqori dozalarda). Ikkalasi ham asab tizimi va immunitet uchun muhim. Ammo katta miqdorda ular bir-birining ta’sirini pasaytirib, faoliyatiga xalaqit beradi. To‘g‘ri muvozanatsiz foyda kam bo‘ladi.
- C vitamini va mis. Askorbin kislotasi ko‘pincha zararsiz qo‘shimcha sifatida qabul qilinadi. Biroq yuqori dozalarda u misning so‘rilishini kamaytirishi mumkin — bu esa moddalar almashinuvi va immunitet tizimi uchun xavf tug‘diradi.
- Foliy kislota va rux. Foliy, ayniqsa aqliy zo‘riqish yoki tiklanish davrlarida zarur. Ammo u haddan ortiq bo‘lsa, ruxning so‘rilishiga to‘sqinlik qilishi mumkin — bu esa teri, gormonlar va immunitet uchun salbiy oqibatlarni keltirib chiqaradi.
- E vitamini va temir. E vitamini temirning faolligini neytrallashtirib, uning vazifasini bajarishiga xalaqit berishi mumkin.
Ammo shunday BFQ (biologik faol qo‘shimcha)lar borki, ular bir-birini to‘ldiradi — alohida qo‘llanilgandan ko‘ra ko‘proq naf keltiradi.
Birgalikda qo‘llanishi shart bo‘lgan birikmalar:
- D vitamini + magniy. Agar magniy yetishmasa, D vitamini faollashmaydi. Magniy uni faollashtiradi va yaxshi o‘zlashtirilishini ta’minlaydi. Shuning uchun bu mineralsiz hatto eng “zamonaviy” D3 qo‘shilmasi ham foydasiz bo‘lib qolishi mumkin.
- C vitamini + temir. Askorbin kislotasi temirning o‘zlashtirilishiga yordam beradi va uning samaradorligini oshiradi.
- Kalsiy + K2 vitamini + D3 vitamini. D3 kalsiyning so‘rilishiga yordam beradi, K2 esa uning kerakli joyga — tomirlarga emas, balki suyaklarga borishini ta’minlaydi. Ular hamjihatlikda ishlaydi va bir-birini mukammal to‘ldiradi.
- Rux + B6 vitamini + magniy. Bu formula, ayniqsa, stress, aqliy charchash yoki uyqu muammolari paytida juda foydali. Rux va magniy asab tizimini qo‘llab-quvvatlaydi, B6 esa ularning yanada samaraliroq ishlashiga yordam beradi.
BFQlar shunchaki bir vosita. Har qanday vositada bo‘lgani kabi ularning ham qo‘llash qoidalari bor. To‘g‘ri tanlanganda, qo‘shimchalar haqiqatan ham samara beradi. Chunki hatto kerakli qo‘shimcha noto‘g‘ri vaqtda yoki haddan tashqari yuqori dozada qabul qilinsa, aksincha ta’sir ko‘rsatishi mumkin.
Shuni yodda tutish kerakki, BFQlar shunchaki tabletka emas, balki fiziologiyaga ta’sir ko‘rsatuvchi faol moddadir. Yondashuv qanchalik to‘g‘ri bo‘lsa, natija shunchalik ko‘ngildagidek bo‘lib, yordam berish ehtimoli yuqori bo‘ladi.
Izoh (0)