Taomlanganda organizm zarur oziq moddalarini olib, kuch va energiya to‘plashi kerak. Ammo ba’zida buning aksi ro‘y beradi — odam ovqatdan keyin o‘zini holsiz, bezovta yoki ko‘ngli ayniyotgandek his qiladi. Bunday holat ko‘pchilikda kuzatiladi va bu doimiy tus olganida jiddiy muammolardan darak berishi mumkin. Nega ovqatdan keyin charchoq va ko‘ngil aynishi paydo bo‘ladi? Bu tananing oddiy reaksiyasimi yoki shifokorga murojaat qilish uchun signalmi? Keling, sabablari va bu holatni yengillashtirish yo‘llarini ko‘rib chiqamiz.
Ko‘pchilikda ovqat iste’molidan keyin charchoq yoki ko‘ngil aynishi kuzatiladi. Bunday simptomlar ba’zi kasalliklar belgilari yoki tananing yeguliklarga bergan oddiy reaksiya ham bo‘lishi mumkin. Ayrim odamlar uchun esa bu holat me’yor hisoblanadi.
Har bir tushlikdan keyin ko‘ngil aynishi va holsizlik sezilsa, shifokorga ko‘rinish kerak. Agar bu holat faqat bir marta yuz bergan bo‘lsa, jiddiy sababi bo‘lmasligi mumkin.
Ovqatdan keyingi charchoq sabablari:
- Qiyin hazm bo‘ladigan taom iste’moli. Bu holsizlik va yengil ko‘ngil aynishiga olib keladi, ayniqsa, og‘ir ovqatlar ichakka tushganda bosim oshadi.
- Hazm qilishga ko‘p energiya sarflanishi. Natijada charchoq paydo bo‘ladi.
- Qon tarkibida glyukoza darajasining oshishi. Odam och bo‘lsa, miya oreksin moddasi ishlab chiqaradi, u tetiklikni ta’minlaydi. Ovqat yegach, glyukoza ko‘tariladi va oreksin ishlab chiqarilishi to‘xtaydi. Shu sababli, uyqu bosadi.
- Dori-darmonlar qabul qilish. Ba’zi dorilar ovqatdan keyin ko‘ngil aynishi va holsizlikni chaqirishi mumkin.
- Haddan tashqari ko‘p ovqat yeyish yoki uzoq vaqt och yurish.
- Och qoringa shirinlik iste’mol qilish.
- Oshqozon operatsiyasidan keyingi holat.
- Endokrin tizimi faoliyatining buzilishi.
Ko‘ngil aynishi va holsizlikdan tashqari ba’zida qusish, qorin og‘rig‘i kabi boshqa simptomlar ham bo‘ladi. Bu esa hazm qilish organlari faoliyatida muammo borligidan darak beradi.
Ovqatdan keyin paydo bo‘ladigan ko‘ngil aynishni qanday bartaraf etish mumkin?
Tananing ovqatni hazm qilishiga yordam berish uchun uglevodli parhez tutish va yog‘ miqdorini kamaytirish tavsiya etiladi. Ovqatdan yarim soat o‘tib biroz yotib dam olish ham mumkin.
Agar ovqatdan keyingi ko‘ngil aynish ehtimolini kamaytirmoqchi bo‘lsangiz, quyidagilarga amal qiling:
- Taomni kichik qismlar bilan yeng;
- Ovqatdan keyin darhol suv ichmang;
- Och qoringa shirinlik yemaslikka va qahva ichmaslikka harakat qiling.
Ko‘ngil aynishning ilk alomatlarida 15 tomchi yalpiz damlamasini suvga aralashtirib ichish yoki yarimta limon yeyish foyda beradi.
Agar ovqat hazm bo‘lmasdan ichakka o‘tib ketsa, hatto kichik miqdordagi ovqatdan so‘ng ham to‘satdan kuchli holsizlik paydo bo‘lishi mumkin. Shu bois, choralar ko‘rishdan oldin holsizlikning sababini aniqlash kerak.
Izoh (0)