Ko‘pchilik kir yuvish kukunini tanlashda uning samaradorligiga e’tibor qaratadi, ammo tarkibidagi kimyoviy moddalar sog‘lig‘imizga qanday ta’sir qilishi haqida deyarli o‘ylamaydi. Aslida ayrim yuvish vositalari tarkibidagi agressiv komponentlar teri orqali organizmga salbiy ta’sir ko‘rsatishi mumkin. Ayniqsa, nozik yoki allergiyaga moyil teriga ega bo‘lgan odamlar buni tezda sezadi. Quyida kir yuvish kukuniga allergiya qo‘zg‘ashining sabablari, ilk alomatlari va uni oldini olish yo‘llari haqida ma’lumot beriladi.
Kir yuvish kukuniga allergiya qanday namoyon bo‘ladi?
Asosan tarkibida kuchli kimyoviy moddalari bor vositalar terida qichishish va achishishga sabab bo‘ladi. Ularda yuzaki faol moddalar (surfactant) miqdori juda yuqori bo‘ladi. Bundan tashqari, ularga ko‘p miqdorda fosfatlar, oqartiruvchi komponentlar va hid beruvchi moddalar qo‘shiladi. Agar kir yuvish kukunidan ortiqcha miqdorda ishlatilsa yoki kiyim yuvilgandan so‘ng yaxshi chayilmasa, holat yanada og‘irlashadi.
Quyidagi belgilar kir yuvish kukuniga allergiyani ko‘rsatishi mumkin:
- Teri quriydi, shish va qurishlar paydo bo‘ladi;
- Keyinchalik toshma va qizil dog‘lar yuzaga chiqadi;
- Ba’zan suyuqlikka to‘la mayda pufakchalar (yallig‘lanmagan, lekin yorilgach qattiq qichishadigan) paydo bo‘ladi;
- Ko‘z qovoqlari shishadi, ko‘zlar qizarib yoshlanadi va qichishadi;
- Ba’zida allergik yo‘tal va nafas olishda qiyinchilik kuzatiladi;
- Burun bitadi.
Kukundagi faol moddalar kiyimdan teriga o‘tganda, terining tabiiy yog‘ himoyasini buzadi. Fosfatlar esa teri muhitining kislotali-ishqoriy muvozanatini izdan chiqaradi — bu esa qichishish, toshma va qizarishlarga olib keladi. Nafas olish bilan bog‘liq muammolar esa ko‘pincha sun’iy hid beruvchi moddalarning ko‘pligi sababli yuzaga keladi. Teri qanchalik nozik bo‘lsa, allergik reaksiya shunchalik kuchli bo‘ladi.
Agar allergiya sababi kir yuvish kukuni bo‘lsa, nima qilish kerak?
Bunday holatda yangi vosita tanlash kerak, buning uchun uning tarkibiga alohida e’tibor qaratish lozim:
- Yuzaki faol moddalar miqdori 15% dan oshmasligiga ishonch hosil qilish kerak;
- Bolalar uchun mo‘ljallangan kukunlarga o‘tish lozim — ularga ko‘pincha hid beruvchi moddalar qo‘shilmaydi;
- Kiyimni yuvgandan keyin albatta yaxshilab chayish zarur.
Shuningdek, allergolog shifokor bilan maslahatlashish tavsiya etiladi. U yuzaga kelgan belgilarni bartaraf etuvchi antigistamin preparatlarini tavsiya qiladi.
Izoh (0)