Kongo Demokratik Respublikasida yuz bergan suv toshqinlari oqibatida 100 dan ortiq odam halok bo‘ldi. Bu haqda rasmiylarga tayanib Al Jazeera xabar berdi.
Ma’lum qilinishicha, kechasi yuz bergan kuchli suv toshqinlari bir nechta qishloqni yuvib ketgan. Tabiiy ofatga kuchli yog‘ingarchilik sabab bo‘lgan.
Shiddat bilan oqayotgan suv yo‘lidagi barcha narsalarni — yirik toshlar, ulkan daraxtlar va loyni o‘zi bilan olib ketib, ko‘l bo‘yidagi uylarni vayron qilgan. Halok bo‘lganlar asosan bolalar va keksalardir, deydi rasmiylar.
Tabiiy ofat oqibatida 28 kishi jarohatlangan va 150 ga yaqin uy buzilgan. Toshqin “juda katta moddiy zarar” yetkazgan. Qutqaruv ishlariga xizmatlar yetishmasligi va aloqa uzilishi xalal bermoqda.
Kongo Demokratik Respublikasining sharqiy qismida hukumat qo‘shinlari va isyonchilar o‘rtasida o‘n yillar davomida to‘qnashuvlar bo‘lib kelmoqda. Yanvar oyi oxirida Ruanda qo‘llab-quvvatlayotgan M23 isyonchi guruhi Goma shahriga kutilmaganda hujum qilib, uni egallab oldi. Shundan keyin mojaro yanada kuchaydi.
Izoh (0)