18-iyul kuni Germaniyadan yangi hukumat davrida birinchi marta qonunbuzarlik uchun sud hukmi chiqarilgan Afg‘oniston fuqarolarini deportatsiya qilish reysini amalga oshirdi. Bu haqda Germaniya ichki ishlar vaziri Aleksandr Dobrindt ma’lum qildi.
Ta’kidlanishicha, bu Germaniya kansleri Fridrix Mers davrida migratsiya siyosatini qattiqlashtirish yo‘nalishidagi birinchi “deportatsiya reysi" bo‘ldi. Samolyot allaqachon Afg‘oniston poytaxtiga qo‘ngan.
Bild nashri ma’lumotlariga ko‘ra, chiqarib yuborilganlar ro‘yxatida 81 nafar afg‘on bor. Ularning sud hukmlarining umumiy muddati ikki yuz yildan ortiq qamoqni tashkil etadi. Ular orasida 12 qotil va 17 jinsiy zo‘ravonlik uchun hukm qilingan, shuningdek, boshqa zo‘ravonlik jinoyatlarini sodir etgan qirqdan ortiq xavfli jinoyatchi bor. Ro‘yxatda bir nechta giyohvand moddalar sotuvchilari ham mavjud.
Qayd etilishicha, chiqarib yuborilganlar orasida 2019-yilda Illerkirxbergda uch sherigi bilan birga qochqinlar markazida 14 yoshli maktab o‘quvchi qizni bir necha soat davomida zo‘rlagan afg‘on ham bor.
Vazir Aleksandr Dobrintning ta’kidlashicha, Afg‘onistonga chiqarib yuborishlar kelgusida ham ishonchli tarzda amalga oshiriladi.
“Chiqarib yuborilishi lozim” maqomidagi afg‘onlarni jo‘natish uchun yana kamida 16 ta reys kerak bo‘ladi, deydi Aleksandr Dobrint.
Xorijliklar markaziy reyestri ma’lumotlariga ko‘ra, 30-iyun holatiga ko‘ra, Germaniyada Afg‘onistonning 1710 fuqarosi bo‘lib, ular kechiktirmasdan chiqarib yuborilishi kerak. GFRga noqonuniy kirgan yana 9462 afg‘onistonlikning esa deportatsiyasi muddati kechiktirilgan.
Izoh (0)