Amerika kompaniyasi Air Company atmosferadagi karbonat angidridni suyuq yoqilg‘i — sintetik benzinga aylantiradigan inqilobiy Airmade qurilmasini taqdim etdi. Muzlatkich hajmidagi qurilma faqat havo, suv va qayta tiklanuvchi elektr energiyasidan foydalanib, kuniga bir litrgacha yoqilg‘i ishlab chiqarishi mumkin. Bu haqda Interesting Engineering nashri xabar bermoqda.
Ta’kidlanishicha, hozirda aviatsiya va dengiz transporti deyarli to‘liq qazib olinadigan yoqilg‘iga bog‘liq. Vodorod yoki akkumulyatorlar kabi muqobil energiya manbalari hozircha ikkinchi darajali ahamiyatga ega. Airmade uglerod neytral yechimni taklif qiladi: bunday yoqilg‘i yonganda havodan qancha uglerod dioksidi olingan bo‘lsa, shuncha miqdorda ajralib chiqadi.
Texnologiya karbonat angidridni elektrokimyoviy qaytarish jarayoniga asoslangan. Qurilma havodagi karbonat angidridni yutib, uni vodorod (suvdan elektroliz yo‘li bilan olingan) bilan aralashtiradi va katalizator yordamida uglevodorodlarga aylantiradi. Hosil bo‘lgan yonilg‘i kimyoviy jihatdan oddiy benzindan farq qilmaydi va mavjud dvigatellarda o‘zgartirishlarsiz ishlatilishi mumkin.
Tizim turar joy, tijorat va sanoat binolarida minimal oldindan sozlash bilan avtomatik ulanish va ishlashga mo‘ljallangan.
Ma’lum qilinishicha, hozircha muzlatgich o‘lchamidagi qurilma faqat kichik hajmda ishlab chiqarilmoqda, ammo kompaniya texnologiyani kengaytirishni rejalashtirmoqda. Asosiy muammolar — elektroliz uchun energiya sarfi tufayli yuqori narx va past samaradorlik. Biroq quyosh yoki shamol elektr stansiyalarining ortiqcha energiyasidan foydalanilsa, jarayon iqtisodiy jihatdan foydali bo‘lishi mumkin.
Air Company allaqachon AQSH harbiy-havo kuchlari va aviatsiya sanoati bilan hamkorlik qilmoqda. Kelajakda bunday qurilmalar chekka hududlarni yoqilg‘i bilan ta’minlashi yoki qayta tiklanadigan energiyani suyuq holda saqlash uchun ishlatilishi mumkin. Agar texnologiya rivojlansa, bu transportni karbonsizlantirish yo‘lidagi muhim qadam bo‘ladi.
Qo‘shimcha qilinishicha, AQSHlik tadqiqotchilar jamoasi sun’iy fotosintez sohasida katta yutuqqa erishdi. Olimlar faqat quyosh nuri energiyasi hisobiga karbonat angidridni suyuq yoqilg‘iga va boshqa qimmatli kimyoviy moddalarga aylantiradigan qurilma ishlab chiqdilar.
Izoh (0)