AQSH prezidenti Donald Trampning matbuot kotibi Karolin Livitt Oq uyda o‘tkazilgan matbuot anjumanida nima sababdan mamlakatda tuxum narxi keskin oshib ketganiga izoh berdi.
Jurnalistning bu boradagi savoliga javob berar ekan, Livitt asosiy ayb avvalgi prezident Jo Bayden ma’muriyati zimmasida ekanini aytib o‘tdi.
“Hozir siz prezident imzolagan inflyatsiya bo‘yicha farmon haqida aytib o‘tdingiz. Tramp prezidentlikka kelganidan beri tuxum narxi keskin oshdi. Xo‘sh, prezident tuxum narxini pasaytirish uchun nimalar qilmoqda?”, deb savol berdi jurnalist.
“Bu masalani ko‘targaningizdan juda xursandman. Chunki tuxum narxining oshishida asosiy aybni Oq uyga yuklayotgan ko‘plab xabarlarga duch kelmoqdaman.
Shuni ta’kidlashni istardimki, 2024-yilda Jo Bayden Oval ofisda o‘tirganida yoki uning yuqori qavatida uxlab yotganida, ochig‘i anig‘ini bilmayman, tuxum narxi 65 foizga oshgan. Oxirgi ma’muriyatning inflyatsion siyosati tufayli nafaqat tuxum, balki boshqa oziq-ovqatlar, shuningdek, benzin narxi oshganini ko‘rdik.
Tuxum taqchilligiga kelsak, Bayden ma’muriyati va Qishloq xo‘jaligi departamenti 100 milliondan ortiq tovuqni ommaviy o‘ldirishga yo‘l qo‘ygan. Bu esa bu mamlakatda ta‘minot yetishmasligiga olib keldi
Shuning uchun tuxum tanqisligi yuzaga kelib, narxlar oshib ketdi”, dedi Karolin Livitt.
Izoh (0)