Bir necha kunlik yog‘li ovqatlanishdan so‘ng ichak yallig‘lanishdan himoyalanish qobiliyatini yo‘qotadi. Immunity jurnalida e’lon qilingan tadqiqot natijalariga ko‘ra, fast-fudga xos bo‘lgan to‘yingan yog‘larga boy parhez ichakning to‘siq vazifasini buzadi va to‘qimalar tiklanishi hamda shilliq qavatni himoya qilish uchun javobgar bo‘lgan IL-22 oqsili ishlab chiqarilishini pasaytiradi.
Avstraliyalik olimlar sichqonlarni bor-yo‘g‘i bir hafta davomida yog‘li ozuqa bilan boqishgan. Natijada ichak himoya vazifalarining zaiflashishi, devorlarning qalinlashuvi va immunitet hujayralarining to‘planishi kuzatilgan — bu yashirin yallig‘lanish belgilaridir. Ikki kundan so‘ng hayvonlar tashqi ko‘rinishdan sog‘lom bo‘lishiga qaramay, organizmda IL-22 miqdorining pasayishi boshlangan.
“Yog‘li taomlar keltirib chiqaradigan yallig‘lanishning o‘ziga xos xususiyati shundaki, u dastlab o‘zini sezdirmaydi, ammo vaqt o‘tishi bilan surunkali tusga kirishi mumkin”, deydi tadqiqot mualliflari.
Tadqiqotchilarning ta’kidlashicha, fast-fuddan voz kechish ichak himoyasini tiklashga yordam beradi, ayniqsa agar to‘yingan yog‘lar yong‘oq va avokadodagi kabi to‘yinmagan yog‘lar bilan almashtirilsa.
Aprel oyida ispan olimlari yog‘li ovqat saraton kasalligining tarqalishini tezlashtirishi mumkinligini isbotlashdi. Ma’lum bo‘lishicha, yog‘larni me’yoridan ortiq iste’mol qilish trombotsitlar faoliyatini kuchaytiradi va fibronektin oqsili miqdorini oshiradi. Bu esa o‘simta metastazlanishi uchun qulay sharoit yaratadi, ayniqsa o‘pkada.
Izoh (0)